Kurdistan: Pêvajoya wergirtina genimê cotkaran dest pê kir

PeyamaKurd - Li Herêma Kurdistanê pêvajoya wergirtina genimê cotkaran ji bo sezona sala 2026an bi fermî dest pê kir.

Rêveberê Bazirganiya Herêma Kurdistanê Newzad Şêx Kamil ragihand ku îsal bi giştî 400 hezar ton genim ji aliyê Bexdayê ve wekî kota hatiye diyarkirin û dê ji cotkaran bê wergirtin.

Li gorî plana Wezareta Bazirganiyê, ev rêjeya kotayê li ser parêzgehan wiha hatiye dabeşkirin:

Ji bo Silêmaniyê 150 hezar û 209 ton, ji bo Hewlêrê 122 hezar û 680 ton, ji bo Dihokê 116 hezar û 83 ton û ji bo Helebceyê jî 11 hezar û 28 ton genim hatiye veqetandin.

Şêx Kamil da zanîn ku ji bo wergirtina genimê zêde yê daxwaza kotayê, bi fermana Serokwezîrê Herêma Kurdistanê komîteyeke taybet hatiye avakirin da ku ev bar bi rêya kerta taybet bê birêvebirin.

Pêvajoya kirîna genim îsal li ser du nirxên cuda yên aborî tê meşandin. Di çarçoveya plana fermî de, ji bo 292 hezar ton genimê di nav kotayê de, her tonek bihayê 700 hezar dînarî hatiye destnîşankirin. Li aliyê din, ji bo 108 hezar ton genimê ku li derveyî planê dimîne, nirxê her tonekê wekî 500 hezar dînarî hate diyarkirin.

Rêveberiya Bazirganiya Dexlûdanê ya Hewlêrê ragihand ku ji bo kêmkirina qerebalixiya li ber sayloyan û rêgirtina li windakirina demê, îsal cara yekem sîstema elektronîk (dîjîtal) ketiye meriyetê.