Di navbera Amerîka û Ewropayê de krîza vîzeyê: Alozî kûr dibe

PeyamaKurd- Rêveberiya Serokê Amerîkayê Donald Trump bi hinceta ku azadiya ramanê tê sînordarkirin û şirketên teknolojiyê yên Amerîkî bi awayekî neheq têne armanckirin, qedexeya vîzeyê danî ser 5 rayedarên Ewropî ku di nav wan de Komîserê berê yê YE Thierry Breton jî heye.

Ev biryar piştî ku Yekîtiya Ewropayê cezayê diravan li şîrketa X a Elon Musk birî hat girtin. Washington îdîa dike ku Ewropa bi rêziknameyên wekî DSA (Qanûna Xizmetên Dîjîtal) sansurê pêk tîne, lê welatên Ewropî ev yek wekî destwerdana di serxwebûna wan de dibînin.

Yekîtiya Ewropayê û Serokomarê Fransayê Emmanuel Macron ev biryara Amerîkayê bi tundî şermezar kirin û diyar kirin ku azadiya ramanê nirxekî bingehîn ê demokrasiya wan e.

Welatên mîna Fransa û Almanyayê destnîşan kirin ku ev gav nayê qebûlkirin û Washington nikare rêziknameyên qada dîjîtal a Ewropayê diyar bike. Ev krîza vîzeyê wekî nîşanek kûr a dabeşbûna stratejîk a di navbera her du aliyan de tê nirxandin ku dikare di pêşerojê de hevkariya transatlantîk bi awayekî cidî biguherîne.