Rageşiya di navbera Pakistan û Afganistanê de zêde dibe!

PeyamaKurd - Piştî zêdebûna pevçûnên li herêma sînor, Pakistanê îro di saet 01:50an de li Kabîlê, paytexta Afganistanê, û herwiha li parêzgehên Qendahar û Paktiya, êrîşên hewayî dest pê kirin.

Li dora saet 01:50an bi dema herêmî, herî kêm sê teqînên mezin li Kabîlê hatin bihîstin û hêzên dijî-balafirî yên Afganistanê bersiv dan êrîşê.

Wezîrê Parastinê yê Pakistanê Khawaja Asif li ser medyaya civakî diyar kir ku sebra wan nemaye û got, "Niha di navbera me de şerekî vekirî heye."

Artêşa Pakistanê îdia kir ku di operasyona bi navê kod "Gazab Lil Hak" (Hêrsa Rast) de zêdetirî 130 çekdarên Talîbanê hatine kuştin û gelek çeper û depoyên cebilxaneyê hatine wêrankirin.

Wezîrê Ragihandinê yê Pakistanê Attaullah Tarar ragihand ku baregeha lîwayê li Kabîlê jî hatiye hedefgirtin.

Di heman demê de, Wezareta Parastinê ya Afganistanê roja Pêncşemê bi şev îdia kir ku di êrîşên li ser sînor de 55 leşkerên Pakistanî hatine kuştin û hin ji wan jî dîl hatine girtin.

Di çend saetên borî de, berdevkê hikûmeta Afganistanê Zebîhullah Mucahîd ragihand ku li hember êrîşên esmanî yên dawî yên Pakistanê, operasyonên êrîşkar ên berfireh li dijî baregeh û tesîsên leşkerî yên Pakistanê li ser Xeta Durand hatine destpêkirin.