Serokê narkotîkê yê navneteweyî Kazem Hemed li Iraqê hat girtin

PeyamaKurd – Rayedarên Iraqê girtina Kazem Hemed Heccemî ragihandin, ku yek ji bazirganên narkotîkê yên herî xeternak ên cîhanê ye û ji aliyê Polîsên Federal ên Awistralyayê ve wekî "hedefa yekem" tê xwestin.

Heccemî, ku di sala 2023an de ji Awistralyayê bo Iraqê hatibû dersînorkirin û ji wê demê ve di bin çavdêriyê de ye, li Iraqê hat binçavkirin.

Polîsên Awistralyayê wêneyên girtinê parve kirin û diyar kirin ku ev girtina krîtîk bûye sedema pevçûnên navxweyî û hilweşîna di nav rêxistina sûcdar de.

Li gorî raporên medyayê, Heccemî, ku bi leqeba "Kazem Malik" tê nasîn, wekî kesayetek sereke di "şerên titûnê" yên li Melbourne de tê nasîn. Ew bi organîzekirina rêze êrîşên şewitandinê û berhevkirina pereyên parastinê di bin navê "Baca Kazem" de tê tawanbarkirin.

Komîsera Polîsên Awistralyayê Krissy Barrett diyar kir ku tevî girtina Heccemî, lêpirsîn di bin "Operasyona Carmen" de berdewam dikin.

Barrett tekez kir ku ew bi tevahî bi rayedarên Iraqê re di pêvajoya qanûnî de hevkariyê dikin da ku vê tora sûcdar a ku li pênc eyaletên Awistralyayê dixebite bi tevahî hilweşînin.