Araqçî: CIA şaş e kapasîteya me ya mûşekî ji sedî 120 e

PeyamaKurd - Wezîrê Karên Derve yê Îranê Abbas Araqçî, îdiayên îstîxbarata Amerîkayê (CIA) yên derbarê kapasîteya mûşekî ya Îranê de red kirin. Araqçî diyar kir ku berevajî raporên CIAyê, hêza wan a mûşekî ne tenê kêm nebûye, lê belê li gorî destpêka şer zêdetir bûye.

"CIA şaş e, em ji sedî 120 amade ne"

Abbas Araqçî li ser hesabê xwe yê medyaya civakî bertek nîşanî îdiayên CIAyê da ku digot "Îranê ji sedî 75ê kapasîteya xwe parastiye". Araqçî got: "CIA şaş e. Stokên me yên mûşekî û kapasîteya me ya avêtinê, li gorî 28ê Sibatê ne di asta ji sedî 75an de ye. Reqama rast ji sedî 120 e." Wî her wiha anî ziman ku amadehiya wan a ji bo parastina gelê xwe "ji sedî hezar" e.

Rexneya li ser Diplomasiyê

Araqçî Amerîka bi "sabotajkirina çareseriyên dîplomatîk" sûcdar kir û got, her carê ku derfetek ji bo dîplomasiyê çêdibe, Amerîka berê xwe dide serpêhatiyên leşkerî. Araqçî destnîşan kir ku gelê Îranê li hemberî zextan tu carî serî natewîne û di her aloziyê de dîplomasî dibe qurban.

Di analîzên ku di çapemeniya Amerîkayê de cih girtin de, dihat îddîakirin ku tevî êrîşên giran ên Amerîka û Îsraîlê, Îranê piranîya hêza xwe ya mûşekî parastiye. Li gorî CIAyê, Îranê ji sedî 75ê rampayên mûşekên mobîl û ji sedî 70yê stokên xwe parastine û gelek baregehên xwe yên bin erdê dîsa xistine meriyetê. Lê belê daxuyaniya Araqçî nîşan dide ku Îran hewl dide peyama "em ji berê bihêztir in" bide cîhanê.