Netanyahû li ser hilweşandina rejîma Îranê: Alîkarî gihîştiye, lê divê gel biryara xwe bide

PeyamaKurd - Serokwezîrê Îsraîlê Benjamîn Netanyahû, di daxuyaniyeke çapemeniyê de ku rasterast li ser televîzyonê hate weşandin, stratejiya welatê xwe ya li dijî Îranê û îhtîmala guhertina rejîmê li Tehranê nirxand.

Netanyahû diyar kir ku ew şert û mercên herî guncaw ji bo gelê Îranê amade dikin, lê gumanên wî li ser serkeftina şoreşeke gel hene.

“Tu nikarî kesekî neçar bikî ku avê vexwe”

Benjamîn Netanyahû derbarê hilweşandina rejîma Îslamî de helwêsteke bi guman nîşan da û got:

Ez ne piştrast im ku gelê Îranê dê rejîmê hilweşîne. Tu dikarî kesekî bibî ber bi avê, lê tu nikarî wan neçar bikî ku wê vexwin.”

Netanyahû tekez kir ku rejîm tenê ji hundir ve dikare were hilweşandin, lê Îsraîl ji bo vê yekê alîkariya pêwîst dike.

Êrîşên li ser Pasdar û Besîcan

Netanyahû ragihand ku êrîşên wan ên asmanî bi armanca lawazkirina hêzên kolanê yên rejîmê berdewam dikin:

Em derbên giran li Pasdarên Şoreşê û Besîc, hêzên wan ên kolanan û xalên wan ên kontrolê didin. Em hewl didin ku qadekê ji gelê Îranê re vekin da ku derkevin kolanan. Me ji gelê Îranê re got ‘alîkarî di rê de ye’; niha alîkarî gihîştiye û yên din jî wê werin.”

Binesaziya nukleerî û kuştina zanyarekî giring

Serokwezîrê Îsraîlê îdia kir ku di operasyonên dawî de binesaziya nukleerî ya Îranê bi giranî hatiye hedefgirtin. Netanyahû ragihand ku di van êrîşan de “zanyarekî nukleerî yê pir giring hatiye kuştin” da ku pêşî li hilberîna çekên atomî û mûşekên balîstîk were girtin.

Hişyariya ji bo Mucteba Xamineyî û Lubnanê 

Netanyahû rêberê nû yê Îranê, Mucteba Xamineyî, wekî “kuklayekî Pasdarên Şoreşê” pênase kir û îşaret kir ku ew jî di nav hedefên wan de ye. Ji aliyê din ve, Netanyahû hişyariyeke tund da hikûmeta Lubnanê û got:

Hizbullahê bêçek bikin, yan na em ê neçar bimînin bi xwe vê yekê bikin.”

Di dawiya axaftina xwe de, Netanyahû îdia kir ku rejîma Îranê niha di asta herî lawaz a dîroka xwe de ye:

Ev Îranek bi tevahî cûda ye; ew êdî wekî berê gefê naxwe. Ew ne heman hêz e.”