Pentagon dest bi hilberîna girseyî ya dronên kamîkaze yên ‘Lukas’ dike

PeyamaKurd - Wezareta Parastinê ya Dewletên Yekbûyî yên Amerîkayê (Pentagon) ragihand ku ew plan dikin hilberîna dronên kamîkaze yên bi navê “Lukas” bi awayekî girseyî bidin destpêkirin. Ev biryar piştî wê yekê hat ku ev dron di operasyonên dawî yên li dijî Îranê de ji aliyê artêşa Amerîkayê ve bi serkeftî hatin bikaranîn.

Li gorî nûçeya rojnameya Wall Street Journal (WSJ), drona êrîşê ya Lukas, ku xwedî yek rotorî ye, wekî guhertoyeke pêşkeftî ya Amerîkî li dijî drona Îranî ya navdar “Shahed” hatiye sêwirandin. Tê zanîn ku Tehran drona Shahed bi berfirehî bi kar tîne û di şerê Ukraynayê de jî dabînî artêşa Rûsyayê kiribû. Pentagon niha dixwaze bi rêya “Lukas” serdestiya xwe ya teknolojîk a li asman xurt bike.

Cîgirê Wezîrê Parastinê yê ji bo Lêkolîn û Endezyariyê, Emil Michael, di konferanseke pîşesaziya parastinê de li Arlingtonê (Virginia) diyar kir ku ew li ser amadekariyên hilberîna mezin dixebitin. Michael derbarê van çekan de got: “Dronên Lukas heta niha bandora xwe li qadê îspat kiriye û bûne sermayeyeke pir hêja di nav cebilxaneya me de. Em ê pêşxistina wan bidomînin da ku ji bo hilberîna girseyî guncan bin.”

Li gorî raporên WSJê, artêşa Amerîkayê di dawiya sala 2025an de ev dron li Rojhilata Navîn bi cih kiribûn. Pisporên leşkerî destnîşan dikin ku hilberîna girseyî ya van dronên “erzan û bibandor” dikare hevsengiyên leşkerî yên li herêmê biguherîne û di şerê li dijî Îranê de derfetên nû bide hêzên Amerîkî.