Ferhan Hec Îsa: Zêdetirî 70 gundên Kobanê di bin kontrola hêzên Şamê de ne

PeyamaKurd – Hevserokê Meclîsa Rêveber a Kantona Firatê, Ferhan Hec Îsa, di daxuyaniyekê de ji bo Rûdawê ragihand ku rewşa herêma Kobanê ji ber dorpêça hêzên hikûmeta Sûriyê (Şam) her ku diçe dijwartir dibe.

Hec Îsa eşkere kir ku niha zêdetirî 70 gundên herêma Kobanê di destê komên çekdar ên ser bi hikûmeta Sûriyê de ne.

Li gorî daxuyaniyê, ev kom ne tenê li gundan bi cih bûne, lê belê dest bi talankirina mal û milkên welatiyan jî kirine.

Zêdetirî mehekê ye ku Kobanî di bin dorpêçeke tund de ye. Hikûmeta Şamê tenê di asteke pir sînorkirî de destûrê dide rêxistinên Neteweyên Yekbûyî ku alîkariyan bînin. Ev rewş bûye sedema kêmbûna nan, derman û sotemeniyê.

Hec Îsa destnîşan kir ku her çend hewldanên dîplomatîk berdewam bin jî, Şam di rakirina dorpêçê û derxistina komên çekdar ji gundan de "dudil" e û niyeta wê di gumanê de ye.

Yek ji hûrgiliyên herî balkêş ên daxuyaniyê, meseleya ewlehiya xwarinê ye. Hat ragihandin ku embarên mezin ên genim li herêmên Çelebiye û Şirînê ketine bin kontrola hêzên hikûmetê. Li şûna ku ev genim ji bo xelkê herêmê yê dorpêçkirî were bikaranîn, hikûmet wî genimî bar dike û dişîne bajarê Helebê.

Hec Îsa diyar kir ku têkiliyên leşkerî yên ji bo "ji nû ve rêxistinkirina hêzan" berdewam dikin. Hêzên Asayîşê û Ewlehiya Giştî niha li ser xeteke 35 kîlometreyî li başûrê Kobanî û herêma Şêxlerê bi cih bûne. Lê belê, ji ber hebûna komên çekdar ên dilsozê Şamê, eniyên stratejîk ên mîna Şîrîn û Çelebiye hîna girtî ne û ti pêşketineke sivîl nehatiye qeydkirin.