Herêma Kurdistanê derfetên veberhênanê pêşkêşî karsazên Siûdî dike

PeyamaKurd - Serokê Lijneya Veberhênanê Mihemed Şukrî diyar kir ku Herêma Kurdistanê bûye navendeke aramiyê û karsaziya vekirî li herêmê.

Serokê Lijneya Veberhênanê Şukrî di Foruma Aborî ya Erebistana Siûdî-Herêma Kurdistanê de ku îro li Hewlêrê hate lidarxistin, axivî û got, "Di bin serokatiya Serokwezîr Mesrûr Barzanî de, me rêyeke stratejîk ji bo cûrbecûrkirina aboriyê girtiye; bi vî awayî, em binesaziyeke xurt li ser bingeha pîşesazî, çandinî û geştiyariyê ava dikin, ne ku tenê xwe bispêrin enerjî, petrol û gaza xwezayî."

Serokê Lijneya Veberhênanê rave kir ku tevî pirsgirêkên aborî yên ku cîhan û herêm pê re rû bi rû ne, veberhênan li Herêma Kurdistanê zêde dibin û baweriya veberhêneran zêde dibe.

Mihemed Şukrî destnîşan kir ku ji bo zêdetirî 210 projeyên veberhênanê yên nû lîsans hatine dayîn ku sermayeya wan heta sala 2025an ji 4 milyar dolarî derbas dibe, û got ku ev yek ji bo Herêma Kurdistanê û Iraqê bi giştî derfetên girîng pêşkêş dike.

Serokê Lijneya Veberhênanê, di axaftina xwe de li ser têkiliyên bi Erebistana Siûdî re, diyar kir ku Keyaniya Erebistana Siûdî veguherînek aborî ya dîrokî derbas dike û Herêma Kurdistanê heman vîzyonê ji bo pêşerojê parve dike.

Mihemed Şukrî şîrketên Siûdî vexwend ku di sektorên çandinî, pîşesazî û geştiyariyê de bixebitin.

Şukrî tekez kir ku şîrket û odeyên bazirganiyê yên herêmî amade ne ku bi veberhênerên Siûdî re hevrêziyê bikin û projeyên hevbeş biafirînin û axaftina xwe wiha bi dawî kir: "Qanûna veberhênanê ya li Herêma Kurdistanê dê wekheviya di navbera veberhênerên navxweyî û biyanî de biparêze, muafiyetên gumrik û bacê jî di nav xwe de bigire, û di veguhestina qezenc û sermayeyê de azadiya tevahî peyda bike li derveyî welat û di nav welêt de."