Zêdetirî 30 kargeh li Zaxoyê bi biryara Hikûmeta Iraqê hatin girtin

PeyamaKurd - Ji ber biryareke hikûmeta Iraqê, zêdetirî 30 kargehên xwarinê li Zaxoyê hatine girtin.

Karmendê kargehê Heval Hesen ji K24 re gotiye, "Ji ber vê biryarê, em heşt roj in bêkar in û me tu hişyariyek berê li ser girtina kargehan negirtiye."

Tevî ku bi sedan berhemên xwarinê di depoyan de mane jî, %80ê karkerên kargeha pakkirina xwarinê bêkar in; piraniya karkeran zewicî û kirêdar in.

Karmendê kargehê Salih Ehmed gotiye, "Ger ev berdewam bike, rewşa aborî ya karkeran wê xirabtir bibe ji ber ku debara wan bi van kargehan ve girêdayî ye û piraniya wan zewicî û kirêdar in."

Xwediyê kargehê Muhammed Ferhad diyar kir, "Nêzîkî 100 ton xwarin di depoyan de mane. Em nikarin hinardeyî başûrê Iraqê bikin."

Latîf Osman, Serokê Odeya Bazirganiyê ya Zaxoyê, got, "Li Zaxoyê 30 kargeh hatine girtin û her kes bêkar e. Bexda bi tundî li dijî Herêma Kurdistanê ye, nemaze di warê bazirganiyê de." Wî diyar kir:

"Biryara hikûmeta Iraqê ya girtina kargehan, kiryara herî dawî ye ku li dijî sektora bazirganiyê li Herêma Kurdistanê hatiye kirin."