Çapemeniya Iraqê: Keça Sedam Husên û Şera li Şamê civiyan

PeyamaKurd – Li gorî nûçeyên ku di çapemeniya Iraqê de hatine belavkirin, keça serokê berê yê Iraqê Rexed Sedam Husên li Şamê bi Serokê demkî yê Sûriyeyê Ehmed Şera re hevdîtinek pêk aniye.

Malpera “Bexdad El Yewm”ê li ser bingeha daxuyaniyên Mehmûd Mowaldî ragihand ku ev civîn bi çavdêriya “îstîxbarata Brîtanyayê” û bi hevahengiya “îstîxbarata Urdinê” hatiye lidarxistin.

Hate diyarkirin ku di vê civînê de, ji bilî Ehmed Şera û Rexed Sedam Husên, Wezîrê Derve yê Sûriyeyê, serokê îstîxbarata Sûriyeyê, du karsazên Urdinî û “heft efserên berê yên artêşa Iraqê” jî amade bûne.

Her çend Mowaldî ev civîn wekî kiryareke “cihê pirsyarê” pênase kiribe jî, hîna hûrgiliyên li ser naveroka gotûbêjan nehatine eşkerekirin.

Heta niha ji aliyê hikûmeta demkî ya Sûriyeyê yan jî malbata Sedam Husên ve tu daxuyaniyên fermî nehatine dayîn da ku vê nûçeyê “piştrast bikin”.