Fuad Husên û Berpirsê Karûbarên DYAyê li Bexdayê civiyan

PeyamaKurd - Wezîrê Derve yê Iraqê Fuad Husên û Berpirsê Karûbarên Dewletên Yekbûyî yên Amerîkayê li Bexdayê Joshua Harris li ser pêşketinên siyasî yên dawî yên li Iraqê û amadekariyên konferansa Hevpeymaniya Navneteweyî ya Têkoşîna li dijî Terorê ku wê li Erebistana Siûdî were lidarxistin, axivîn. Di heman demê de tekezî li ser pêwîstiya parastina saziyên destûrî kirin.

Wezîrê Derve yê Iraqê Fuad Husên doh mazûvaniya Berpirsê Karûbarên Dewletên Yekbûyî yên Amerîkayê Joshua Harris kir.

Yek ji mijarên sereke yên rojeva civînê amadekariyên konferansa Hevpeymaniya Navneteweyî ya Têkoşîna li dijî Terorê ku wê li Riyadê were lidarxistin bû.

Wezîr Husên girîngiya beşdarbûna aliyê Amerîkî di vê konferansê de ji bo xurtkirina hewldanên navneteweyî ji bo jiholêrakirina gefên terorîstî li herêmê tekez kir.

Di civînê de herwiha pêvajoya avakirina hikûmeta Iraqê hate nîqaşkirin, Fuad Husên û Joshua Harris li ser rewşa siyasî û helwestên cuda yên aliyan di derbarê pêvajoya siyasî de axivîn.

Di vê çarçoveyê de, girîngiya piştgiriya aramiya welêt û parastina rûmeta saziyên destûrî bi awayekî ku xizmeta berjewendiyên gelê Iraqê bike hate tekezkirin.

Iraq niha di qonaxeke siyasî ya krîtîk re derbas dibe û hewldanên ji bo avakirina kabîneyeke nû ya hikûmetê di nav pêşbaziyeke dijwar a di navbera blokên siyasî de didomin.

Li ser eniya ewlehiyê, Hevpeymaniya Navneteweyî ya Dijî DAIŞê ya bi serokatiya Amerîkayê hevrêziya xwe bi hêzên Iraqê re didomîne da ku rê li ber vejîna rêxistinên terorîst bigire.

Konferansa li Riyadê wekî gaveke girîng ber bi nûjenkirina stratejiya cîhanî ya dijî terorê tê dîtin.