Nav û pêkhateya partiya DEMê diguhere

PeyamaKurd – Li gorî agahiyên ku di medyaya Tirk (Habertürk) de hatine weşandin, Partiya Wekhevî û Demokrasiyê ya Gelan (DEM Parti) amadekariyên veguherîneke radîkal dike.

Di çarçoveya "pêvajoya çareseriyê" û rapora komîsyona parlamentoyê de, partî biryar daye ku nav, rêzikname û avahiya xwe ya organîk bi tevahî nû bike.

Armanca vê pêngavê ew e ku partî xwe bi "ruhê pêvajoyê" re biguncîne û di bin vîzyona "Partiya Tirkiyeyê" de bibe xwedî bandoreke berfirehtir.

Yek ji guhertinên herî balkêş, hilweşandina modela pir-sîwanî ye. Tê payîn ku saziyên wekî Kongreya Civaka Demokratîk (DTK), Kongreya Demokratîk a Gelan (HDK) û Partiya Herêmên Demokratîk (DBP) werin girtin.

Li şûna vê modela belavbûyî, dê sîstema "yek sîwan" were avakirin û hemû pêkhateyên çepgir û Kurd di bin banê partiya nû de werin yekkirin. Herwiha, di navê nû yê partiyê de dê tekezî li ser têgeha "Komara Demokratîk" were kirin, ku armanc jê dagirtina wateya demokrasiyê di nav sîstema komara Tirkiyê de ye.

Di warê rêveberiyê de jî nûbûn di rojevê de ne. Her çend tê payîn ku Hevserok Tuncer Bakırhan di cihê xwe de bimîne jî, kadroyên rêveberiya navendî dê bi rêjeyeke mezin werin guhertin.

Ev veguherîna dîrokî dê di kongreya mezin a ku ji bo mehên havînê hatî plankirin de bi fermî were ragihandin. Lê belê, wextê kongreyê dê rasterast bi leza geşedanên pêvajoya aştiyê û gavên yasayî ve girêdayî be.