3 dewletên Ewropî hişyarî da Îranê: Yan danûstandin yan jî cezayên nû

PeyamaKurd – Fransa, Almanya û Brîtanyayê hişyariyeke tund da Komara Îslamî ya Îranê û ragihandin ku sebra wan a dîplomatîk ber bi dawîbûnê ve diçe. Her sê welatên mezin ên Ewropayê eşkere kir ku eger Tehran di demeke kurt de venegere ser maseya danûstandinên nukleerî, ew amade ne ku cezayên giran ên Neteweyên Yekbûyî (NY), yên ku berê hatibûn rakirin, ji nû ve ferz bikin.

Di nameyeke fermî de ya ku ji Neteweyên Yekbûyî re şandine, wezîrên karên derve yên van her sê dewletan niyeta xwe ya bikaranîna mekanîzmaya bi navê "snapback" anî ziman. Ev mekanîzma rê dide wan ku bêyî erêkirina endamên din ên Konseya Ewlekariyê, cezayên li ser Îranê ji nû ve aktîf bikin. Di nameyê de hatiye tekezkirin ku eger Îran vê derfeta dawî ji bo çareseriya dîplomatîk bi kar neyîne, ew ê vê gavê biavêjin.

Ev gav piştî serdemeke tijî alozî hat ku tê de tengezarî li ser bernameya nukleerî ya Îranê gihîştiye asta herî bilind. 2 meh berê, tesîsên nukleerî yên Îranê rastî êrîşên esmanî yên Amerîka û Îsraîlê hatibûn. Her çend di hevdîtinên meha borî yên li Tirkiyeyê de pêşniyareke nû ji Îranê re hatibû kirin ku mohlet heta meha Îlonê bê dirêjkirin, lê Tehranê heta niha bersiveke erênî nedaye wê pêşniyarê.

Mohleta yasayî ya cezayên heyî yên NYyê di 18ê Cotmehê de dê bi dawî dibe. Ji ber vê yekê, bloka E3yê dixwaze berî wê tarîxê tevbigere da ku zextê li ser Îranê bidomîne û rê li ber metirsiya çekên nukleerî bigire.

Welatên Ewropî careke din bang li Îranê dikin ku berî ku dereng bikece vegere ser maseya danûstandinan, lê tekez dikin ku dem pir kêm maye.

Ev nivîs 81 car hatiye xwendin.