Berpirsê Karûbarên Siyasî yê Efrînê: Li Sûriyê ji xeynî Erebî, hemû zimanên din biyanî ne

PeyamaKurd – Mihemed Senkerî, Berpirsê Karûbarên Siyasî yê Efrînê, di hevpeyvînekê de li gel Rûdaw TVyê, îdîayên ku zimanê Kurdî li dibistanên Efrînê hatiye qedexekirin red kir. Senkerî diyar kir ku hemû zimanên ji xeynî Erebî wekî "zimanê biyanî" têne qebûlkirin û got ku di perwerdeya zimanên din de, tevî Kurdî, tu guhartin nehatiye kirin.

Senkerî destnîşan kir ku bi destpêkirina sala nû ya xwendinê re, bernameyên perwerdeyê li seranserê Sûriyê hatine yekkirin û Efrîn jî beşek ji vê pêkanînê ye. Wî wiha anî ziman: "Berî rizgarkirina Efrînê dibistan hebûn ku bi Kurdî perwerde didan, lê piştî rizgariyê, bernameyên perwerdeyê li hemû bajaran hatin yekkirin."

Senkerî bal kişand ser biryara Wezareta Perwerde û Hîndekariyê ya 27ê Cotmeha 2025an û bibîr xist ku biryarê ev xal dihewîne: "Di sala xwendinê ya 2024-2025an de dê di zimanên biyanî de ti guhartin neyê kirin." Wî got, "Hemû zimanên ji xeynî Erebî zimanên biyanî ne. Kurdî, Tirkî, Rûsî, Fransî an Îngilîzî, hemû di nav vê de ne."

Senkerî tekezî li ser başbûna rewşa ewlehiyê ya Efrînê kir û got, "Piştî rizgarkirinê, Wezaretên Navxweyî û Berevaniyê kontrola çekan dabîn kirin û hemû çekên ji çarçoveya qanûnî der bûne hatin komkirin. Êdî ji bilî dewletê çek nemaye."

Li gel kontrola çekan û mekanîzmayên ewlehiyê, Senkerî behsa pirsgirêkên milk û demsala zeytûnan li Efrînê jî kir û diyar kir ku bi riya "Komîsyona Vegerandina Maf û Gazinan" rewşên desteserdirêjiya neheq li ser milkan di nava 48 saetan de têne çareserkirin.

Senkerî ragihand ku hejmara malbatên ku vegeriyane Efrînê gihîştiye 53 hezar û 797 malbatan. Wî got, "24 hezar û 305 malbat li ser ax û malên xwe ji nû ve bi cih bûn. Ewlehiya vegeriyayan garantîkirî ye."

Di bersiva pirsên der barê perwerdeya bi Kurdî de, Senkerî ev anî ziman: "Kurdî nehatiye qedexekirin, lê hemû zimanên ji xeynî Erebî wekî zimanê biyanî hatin qebûlkirin. Em bi Rêveberiya Perwerdeyê ya Efrînê re di nava koordînasyonê de ne, ji bo ji nû ve dest bi perwerdeya Kurdî bikin."

Ev nivîs 40 car hatiye xwendin.