IAEA: Santrala Nukleerî ya Zaporijya bû armanca êrîşa dronan
PeyamaKurd- Ajansa Navneteweyî ya Enerjiya Atomê (IAEA) ragihand ku rayedarên li Santrala Nukleerî ya Zaporijya ya li Ukraynayê wan agahdar kirine ku yek ji sazgehên alîkar ên santralê ji aliyê topbaranan û balafirên bêmirov (drone) ve hatiye lêdan.
Ev êrîş di demjimêrên sibê de pêk hat û tîmên IAEA dengên teqînan û dûmana bilindbûyî ji herêmê bihîstin û dîtin. Sazgeha alîkar bi qasî 1200 metre dûrî sînorê santrala nukleerî ye.
Di daxuyaniyê de hate gotin, “Ev bûyer, rêzeya bûyerên van hefte û mehên dawî diyar dike ku şerê li dora Santrala Nukleerî ya Zaporijya metirsiyên mezin li ser ewlehiya nukleerî çêdike. IAEA her dem balê dikişîne ser girîngiya parastina van sazgehên hesas ji êrîşên leşkerî. Bûyerên wiha dibin sedema zêdebûna fikarên navneteweyî derbarê rewşa ewlehiya nukleerî li herêmê û pêşîgirtina li felaketek potansiyel.”
Serokê IAEA Rafael Grossi destnîşan kir ku her êrîşek li nêzîkî santraleke nukleerî, bêyî ku armanc çi be, xwedî metirsiyên potansiyel ên ewlehiya nukleerî ye û divê jê dûr bisekinin.
Grossi bang li hemû aliyan kir ku li nêzîkî tesîsên nukleerî bi hesasbûna leşkerî ya herî zêde tevbigerin da ku rîska qezayeke nukleerî were astengkirin.
Ev nivîs 141 car hatiye xwendin.
