Îran plan dike ku piştgiriya xwe ya bo Hûsiyan qut bike

PeyamaKurd – Hat ragihandin ku piştî zextên Amerîkayê, Îran plan dike ku piştgiriya xwe ya bo Hûsiyên li Yemenê qut bike. 

Karbidestekî Îranî, ku bi şertê ku nasnameya wî neyê aşkerakirin, ji Rojnameya Telegraphê re axivî, diyar kir ku ferman hatiye dayîn ku personelên leşkerî ji Yemenê bên vekişandin.

Wî ku aşkere kir ku nîgeraniya Îranê heye ku kuştina serbazekî Îranê di dema êrîşên Amerîkayê de aloziyan zêdetir bike. 

Her wiha tê gotin ku birêveberiya Tehranê plan dike ku ji ber polîtîkayên Serokê Amerîkayê, Donald Trump piştgiriya hêzên cuda yên li herêmê bi taybet Hûsiyan gelekî kêm bike. 

Wî amaje bi gefên birêveberiya Trump kir û got:

“Di her hevdîtinê de li ser Trump nîqaş tê kirin. Yek ji komên herêmê yên ku em piştgirî didin wan nayê nîqaşkirin.”

Rayedarê Îranî her wiha balê dikêşebser geşedanên dawî yên li Rojhilata Navîn û destnîşan dike ku “Hûsî rojên xwe yên dawî dijîn.”

Di nûçeya Telegraphê de hatiye diyarkirin ku birêveberiya Tehranê nekariye rê li ber rûxandina rejîma Esad an jî windahiyên Hizbullahê yên li hember Îsraîlê bigire û Hûsî jî dixwazin ji valahiya desthilatdariyê ya ku derketiye holê sûd wergirin. 

Tê diyarkirin ku Amerîka ji bo pêşî li vê yekê bigire û zextên li ser Îranê zêde bike ketiye nava tevgerê.

Di nûçeya CNNê ya roja Sêşemê de jî hat ragihandin ku Amerîka ji bo ku Îran û Hûsiyan bitirsîne, bombeyên dizî yên B2 li Okyanûsa Hindê bi cih kirine.

Serokê berê yê Amerîkayê Joe Biden di sala 2021ê de Hûsî ji lîsteya rêxistinên terorîst derxistibû.

Trump meha borî fermana êrîşa li dijî Hûsiyan dabû û hatibû ragihandin ku di bombebaranê de herî kêm 61 kes mirin û zêdetirî 140 kes jî birîndar bûn. 

Hûsî di şerê Xezeyê de piştgiriya xwe ji Hamasê re ragihandin û êrîşên ku li herêmê çalakiyên deryayî asteng kirin pêk anîn.

Trump got ku wî di 5ê Adarê de ji rêberê olî yê Îranê Elî Xamineyî re nameyek şandiye û xwestiye li ser bernameya nukleerî pêk were.

Ev nivîs 41 car hatiye xwendin.