Nûnerê Taybet ê Trump ê Ûkraynayê: Rûsya şer winda dike
PeyamaKurd – Keith Kellogg, Nûnerê Taybet ê Serokê Amerîkayê Donald Trump bo Ûkraynayê, di daxuyaniyeke eşkere de ragihand ku Rûsya di şerê xwe yê li dijî Ûkraynayê de bi ser nakeve û di vî şerî de winda dike.
Li gorî Kellogg, wî ev nirxandin rasterast ji Serok Trump re pêşkêş kiriye. Kellogg diyar kir ku Trump jê pirsî, "Gelo Rûsya di şer de bi ser dikeve?" û wî bersiv da, "Na, Rûsya di şer de bi ser nakeve."
Kellogg ji bo piştgirîkirina dîtina xwe, argumanên stratejîk anî ziman û got, "Eger Pûtîn bi ser ketibûya, ew ê niha li Kîevê bûya. Ew ê li Odessayê bûya, xwe gihandibûya peravê rojavayê çemê Dniester, û wî dê hikûmeta Ûkraynayê biguheranda. Ji ber ku ev yek pêk nehat, Rûsya şer winda dike."
Nûnerê Amerîkî her weha hêza leşkerî ya Rûsyayê kêm nirxand û pesnê artêşa Ûkraynayê da. "Artêşa Rûsyayê ne ewqas bi hêz e ku Pûtîn îdîa dike. Ji ber vê yekê artêşa Ûkraynayê hêjayî pesindayînê ye. Ez bawer nakim ku divê kes ji artêşa Rûsyayê bitirse. Potansiyela wan a meşa ber bi Berlînê an cihekî din ve nîne."
Derbarê gefên navokî yên Rûsyayê de, Kellogg got ku ev mijar di Odeya Oval de hatiye nîqaşkirin û anî ziman:
"Pûtîn carinan gefa bikaranîna çekên nukleerî dixwe. Lê divê neyê jibîrkirin ku Dewletên Yekbûyî, Brîtanya û Fransa jî xwedî çekên nukleerî ne."
Ev daxuyanî di demekê de tên ku gelek karbidestên rojavayî li ser pêşketinên Rûsyayê yên li qada şer gumanan tînin ziman û piştgiriya xwe ya ji bo Kîevê dubare dikin.
Ev nivîs 103 car hatiye xwendin.
