Serokê Herêma Kurdistanê Nêçîrvan Barzanî diçê Bexdayê

PeyamaKurd - Serokê Herêma Kurdistanê Nêçîrvan Barzanî ji bo beşdarbûna civîna Koalîsyona Rêveberiya Dewletê ya Iraqê çû Bexdayê.

Li gorî agahiyan, ev civîn piştî serdanên dîplomatîk ên Serokwezîrê Iraqê Elî Zeydî yên bo Washington, Enqere û Tehranê tê encamdan.

Di vê civîna girîng de nûnerên partiyên siyasî yên sereke û nûnerên pênc serokatiyên dewletê (Serokatiya Komarê, Parlamentoya Iraqê, Encûmena Wezîran, Encûmena Bilind a Darazê û Serokatiya Herêma Kurdistanê) li ser mijarên ewlehî, siyasî û aborî yên herêmê dicivin.

Tê çaverêkirin ku Barzanî li gel civîna giştî ya koalîsyonê, bi Serokwezîr Elî Zeydî re jî hevdîtineke taybet bike.

Koalîsyona Rêveberiya Dewletê ku di dawiya sala 2022an de ji bo avakirina hikûmeta navendî hatibû damezrandin, wekî hevbendiya desthilatê ya sereke ya Iraqê kar dike û partiyên Şîe, Sune, Kurd, Xiristiyan û Turkmenan li civata xwe dicivîne.

Ev serdana Nêçîrvan Barzanî ya bo Bexdayê tenê çend roj piştî serdana wî ya dîrokî ya bo Şamê û hevdîtina bi Serokkomarê Sûriyeyê Ehmed el-Şer re pêk tê.

Di vê serdemê de ku alozî û geşedanên herêmî encamên krîtîk derdixin holê, hevahengî û hevdîtinên navbera Hewlêr û Bexdayê qada dîplomasiyê zindî tîne.