Trump pêşniyara Pûtîn a ji bo ûranyûma Îranê red kir: Ez peymanên xerab nakim

PeyamaKurd - Serokê Amerîkayê Donald Trump, pêşniyara Serokê Rûsyayê Vladimîr Pûtîn a ji bo bidawîkirina şerê li Îranê bi tundî red kir. Tê ragihandin ku Trump daxwaza Pûtîn a ji bo veguhestina ûranyûma Îranê bo Rûsyayê wekî “peymaneke xerab” pênase kiriye.

Nexşerêya Pûtîn: Ûranyûm ber bi Rûsyayê ve

Li gorî nûçeya malpera Amerîkî Axiosê ku xwe dispêre rayedarên payebilind ên Washingtonê, di pêwendiyeke telefonî de Vladimîr Pûtîn nexşerêyek pêşkêşî Donald Trump kiriye. Di vê pêşniyarê de hatiye xwestin ku ji bo rawestandina operasyonên leşkerî, hemû ûranyûma dewlemendkirî ya Îranê derbasî axa Rûsyayê bibe.

Trump: Garantiyên ewlehiyê tê de nînin 

Donald Trump ev pêşniyara Pûtîn red kir û sedema wê jî wekî “nebûna garantiyên tevahî yên derbarê ewlehiya ûranyûmê” nîşan da. Karbidestekî Amerîkî derbarê helwesta Trump de wiha axivî:

Serok bi her kesî re diaxive; çi Putin be, çi Xi Jinping be... Ew her gav amade ye ji bo peymanekê, lê divê ew ‘peymaneke baş’ be. Serok peymanên xerab nake.”

Armanca Washingtonê: Rakirina gefa nukleerî 

Hate tekezkirin ku helwêsta Dewletên Yekbûyî yên Amerîkayê (DYA) di mijara nukleerî de zelal e; Washington dixwaze gefa çekên nukleerî bi temamî ji holê rake û ewlehiya ûranyûmê bi awayekî navneteweyî misoger bike. Berê pêşniyara hikûmeta Îranê ya ji bo şilkirina ûranyûmê ya di tesîsên xwe de jî ji aliyê rêveberiya Trump ve hatibû redkirin.

Ev geşedan nîşan dide ku Trump li dijî Îranê li pey serkeftineke mitleq e û naxwaze bi rêyên ku garantiyên wan kêm in operasyonên xwe yên leşkerî rawestîne.