Vebijarka midaxeleya leşkerî ya li dijî Îranê pêşkêşî Kongreya Amerîkayê hat kirin

PeyamaKurd – Rageşiya di navbera Amerîka û Îranê de gihîştiye lûtkeya herî bilind û rêveberiya Serok Trump bi awayekî fermî "vebijêrka leşkerî" pêşkêşî serokên Kongreyê kir.

Wezîrê Derve Marco Rubio di civîneke girtî de hişyarî da ku heke gera dawî ya danûstandinên nukleerî li Cenevreyê têk biçe, Washington amade ye bi her awayî rê li ber çekên nukleerî yên Tehranê bigire.

Serokê Piraniya Komarparêzan di Senatoyê de, John Thune, piştgirî da vê helwêstê û diyar kir ku ji bo parastina ewlehiya neteweyî ya Amerîkayê divê sîstema leşkerî di amadebaşiyê de be.

Li Kongreyê bêhna şer û nakokiyên navxweyî 

Lê belê ev amadekariyên leşkerî di nav qada siyasî ya Washingtonê de bûne sedema dubendiyeke kûr û Demokratan bi tundî bertek nîşan dan.

Rêberê Demokratan Chuck Schumer û hevalên wî atmosfera civînê wekî "bêhna şer" pênase kir û hişyarî dan ku divê rêveberiya Trump bêyî pejirandina Kongreyê û pêşkêşkirina delîlên zelal gelê Amerîkayê nexe nav pevçûneke wêranker.

Endamên Kongreyê bi bîr xistin ku li gorî destûrê mafê ragihandina şer tenê di destê wan de ye û divê îstîxbarata berfireh bi wan re were parvekirin.

Tevî amadekariyên li ser erdê, Qesra Spî hîn jî dibêje ku deriyê dîplomasiyê nehatiye girtin lê hişyarî dide ku dem êdî bi dawî dibe.

Rayedarên Amerîkî destnîşan dikin ku eger Tehran di demeke kurt de li Cenevreyê gavên berbiçav neavêje, vebijarkên leşkerî dê wekî xeta dawî li dijî navendên nukleerî yên Îranê werin bikaranîn.