Berpirsê ENKSyê ji bo Kobanê bang kir: Bajar di bin dorpêçeke "fetisandinê" de ye

PeyamaKurd – Serokê Encumena Xwecihî ya Kobaniyê ya ser bi ENKSyê, Ednan Bozan, derbarê rewşa mirovî ya bajêr de hişyariyeke tund da û ragihand ku Kobanî rûbirûyî karesateke mezin a tenduristiyê ye.

Bozan diyar kir ku ji ber girtina hemû korîdorên mirovî ji aliyê sînorê Tirkiyeyê, artêşa demkî ya Sûriyeyê û xetên şer ve, bajar di bin dorpêçeke "fetisandinê" de maye.

Bozan bal kişand ser qutbûna xizmetên bingehîn û eşkere kir ku zêdetirî 10 rojan e elektrîk û înternet bi temamî qut bûne. Ji ber nebûna sotemeniyê, pompên avê naxebitin û bihayê tankereke avê gihîştiye asteke pir bilind.

Di warê tenduristiyê de jî, berpirsê ENKSyî hişyarî da ku şîrê pitikan û dermanên nexweşiyên kronîk qediyane û ji ber nebûna kelûpelan, neştergerî li nexweşxaneyan hatine sekinandin.

Ednan Bozan bang li hikûmeta demkî ya Sûriyeyê kir ku rê bide Dezgeha Xêrxwaziya Barzanî (BCF) da ku alîkariyên lezgîn bigihînin bajêr.