Hikûmeta Herêma Kurdistanê gaveke dîrokî ji bo pêşvebirina zimanê Kurdî avêt!

PeyamaKurd – Hikûmeta Herêma Kurdistanê heft projeyên stratejîk ên mezin ji bo dîjîtalîzekirin û cîhanîkirina zimanê Kurdî ragihand.

Hikûmetê di merasîmekê de ku li Hola Konferansê ya Saad Abdullah li Hewlêrê hat lidarxistin, rêzeprojeyên ji bo pêşxistin, standardîzekirin û cîhanîkirina zimanê Kurdî eşkere kir.

Li gorî daxuyaniyek ji Ofîsa Medya û Agahdariyê ya Hikûmeta Herêma Kurdistanê, ev proje beşek ji vîzyona kabîneya nehemîn a hikûmetê ne ji bo parastin û dewlemendkirina zimanê dayikê û hemî sektorên sereke (perwerde, teknoloji û têkiliyên navneteweyî) vedihewîne.

Projeyên ku hatine ragihandin ev in:

1- Hînkirina Kurdî ji biyaniyan re: Rêzepirtûkek bi navê "Bi Hêsanî Kurdî Fêr Bibe", ku ji bo axaftvanên 13 zimanên cûda (7 zimanên Ewropî, 3 zimanên Rojhilata Navîn û ji bo cara yekem, Çînî, Japonî û Koreyî) hatiye amadekirin, hate nasandin.

2- Çareseriya Teknîkî (Edîtorê Kurdî): Yekem amûra rastnivîsîna Kurdî ji bo Microsoft Word û Excel, ku roleke bi bandor di rastkirina xeletiyên rastnivîsînê û yekkirina standardên rastnivîsînê de dilîze, hate ragihandin.

3- Daneyên Mezin û Zekaya Sûni: "Sîstema Qeyda Ferhenga Kurdî" ku zêdetirî 300,000 peyvan dihewîne, hatiye afirandin. Ev sîstem li ser morfolojî û semantîkê ye û wekî binesaziyek ji bo karanîna zimanê Kurdî di zekaya sûni de tê hesibandin.

4- Sîstema (K-IELTS): Sîstemeke testa zimanê Kurdî ya dişibihe azmûnên navneteweyî yên wekî IELTS û TOEFL ji bo pîvandina asta jêhatîbûna biyaniyan û serlêderên sertîfîkayê yên fermî hatiye destnîşankirin.

5- Alfabeya Kurdî ji bo Zarokan: Projeyek perwerdehiyê ya nû ku tîp û dengên Kurdî bi karanîna sepan û anîmasyonan fêrî zarokên dibistana seretayî dike.

6- Rêzeya Çîrokên Zarokan: Berhevokek çîrokên nivîskî û dengî ku bi awayekî pir hunerî ji bo komên temenî yên cûda hatine amadekirin.

7- Ferhenga Rengîn: Ferhengek ku 31 mijarên zanistî û rojane yên cûda dihewîne.

Nivîskar û zimannas Feryad Fazil di merasîmê de axivî û girîngiya vê înîsiyatîfê tekez kir û got, "Me hewl da ku bi rêya teknolojiyê zimanê Kurdî bi cîhanê bidin nasîn. Ev proje gaveke dîrokî ye ji bo zimanê Kurdî di nav zimanên standard ên cîhanê de cih bigre ."