Îranê seferên bi otomobîlên taybet li hemwelatiyên Herêma Kurdistanê qedexe kir

PeyamaKurd – Rêveberiya Deriyê Navneteweyî yê Perwêzxan agahdariyek ji bo hemû hemwelatiyên Herêma Kurdistanê û Iraqê belav kir.

Li gorî daxuyaniyê, ji destpêka meha bê ve, guhertineke demkî di rênimayiyên derbasbûna sînor de pêk tê.

Ji roja 01.03.2026ê pê ve, tu hemwelatiyekî ku xwediyê pasaporta Iraqî be, nikare bi otomobîla xwe ya taybet di deriyê sînor ê Perwêzxan re derbasî nav axa Rojhilatê Kurdistanê û Îranê bibe. Ev biryar heta demeke nediyar û derketina rênimayiyên nû yên wezaretên peywendîdar berdewam dike.

Berpirsên deriyê sînor diyar kirin ku ev gava han ji bo rêkxistina mekanîzmayên nû yên hatûçûnê hatiye avêtin. Heya ku sîstema nû neyê amadekirin, geştkirina bi otomobîlên taybet tê ragirtin. Piştî temambûna amadekariyan, dê bi awayekî fermî asayîbûna hatûçûnê were ragihandin.

Rêveberiya Perwêzxan daxwaz ji Kurdistaniyan kir ku ji bo ku rastî zehmetiyan neyên:

1. Bi otomobîlên xwe yên taybet serdana deriyê sînor nekin.
2. Bi tenê ji bo geştên bi piyan an bi wesayîtên veguhastina giştî rênimayî wekî xwe dimînin.

Ev biryar di demekê de tê ku li seranserê sînorên Iraq û Îranê rênimayiyên ewlehî û gumrikê tên nûkirin.