نێچیرڤان بارزانی پێزانینی هەرێمی کوردستان بۆ پشتگیرییەکانی ئیتاڵیا دووپات دەکاتەوە

پەیامی کورد   ...   نێچیرڤان بارزانی پێزانینی هەرێمی کوردستان بۆ پشتگیرییەکانی ئیتاڵیا دووپات دەکاتەوە

هەر لە پەراوێزی کۆنفرانسی ئاسایشی میوونشن دا، هەینی 2026/2/13،  نێچیرڤان بارزانی، سەرۆکی هەرێمی کوردستان، لەگەڵ گویدۆ کرۆسێتۆ، وەزیری بەرگری ئیتاڵیا کۆبووەوە.

لە کۆبوونەوەکەدا پەرەپێدانی پەیوەندییەکانی ئیتاڵیا لەگەڵ عێراق و هەرێمی کوردستان و بەهێزکردنی هاوکاری ئەمنی و سەربازی تاوتوێ کران. سەرۆک نێچیرڤان بارزانی سوپاس و پێزانینی هەرێمی کوردستانی بۆ پشتگیرییەکانی ئیتاڵیا و ڕۆڵی کارای لە چوارچێوەی هاوپەیمانی نێودەوڵەتی دا بۆ مەشق و ڕاهێنان بە هێزی پێشمەرگە دەربڕی.

لای خۆیەوە، وەزیری بەرگری ئیتاڵیا پابەندی ووڵاتەکەی بۆ بەردەوامی پشتگیریکردنی عێراق و هەرێمی کوردستان دووپات کردەوە و ستایشی ڕۆڵی پێشمەرگەی لە تێکشکاندنی تیرۆردا کرد.

دوایین پێشهاتە ئەمنییەکانی ناوچەکە و مەترسییەکانی تیرۆر، تەوەرێکی دیکەی دیدارەکە بوو.