پەیامی کورد   ...   سەرۆک بارزانی پێشوازی لە باڵیۆزی فەڕەنسا لە عێراق کرد

دووشه‌ممه‌ 11ـی تشرینی دووەمی 2024 لە سەلاحەدین سەرۆک مەسعوود بارزانی پێشوازی لە پاتریک دۆریل باڵیۆزی فەڕەنسا لە عێراق کرد.

لە دیدارەکەدا کە (یان برێم) کونسووڵی گشتی فەڕەنسا لە هەولێریش ئامادەی بوو، باڵیۆزی فەڕەنسا لە عێراق پیرۆزبایی سەرکەوتنی هەڵبژاردنی پەرلەمانی کوردستانی لە سەرۆک بارزانی کرد و پێزانینشی بۆ ڕێژەی زۆری بەشداری هاووڵاتیانی هەرێم لە کەشێکی ئارام و دیموکراسیانەی هەڵبژاردنی پەرلەمانی کوردستان لە ئۆکتۆبەری ڕابردوودا هەبوو.

لای خۆیەوە سەرۆک بارزانی بەشداری بەرچاوی هاووڵاتیان و بەڕێوەچوونی سەرکەوتوانەی هەڵبژاردنی بە پاڵپشتێکی گەورە بۆ شەرعیەت و دامەزراوەکانی هەرێم لە قەڵەم دا و سوپاسی کۆمەڵگەی نێودەوڵەتی و لایەنەکانیشی کرد بۆ چاودێریکردنی ئەو هەڵبژاردنە.

هەر لەو دیدارەدا هەڵسەنگاندن بۆ بارودۆخی سیاسیی عێراق و ناوچەکە و پەیوەندییەکانی نێوان هەولێر و بەغدا کرا و جەختیش لە پەیوەندی و دۆستایەتی نێوان گەلی کوردستان و گەلی فەڕەنسا کرایەوە.

لە بەشێکی تری ئەو دیدارەدا باڵیۆزی فەڕەنسا لە عێراق سوپاسی سەرۆک بارزانی کرد بۆ بایەخدان و پاڵپشتیکردنی بەڕێوەچوونی ڕێوڕەسمی یادکردنەوەی سەد ساڵەی لەدایکبوونی دانیال میتێران کە ڕۆژی 12ی تشرینی دووەمی 2024 لە شاری هەولێر بەڕێوە دەچێت.