Li Hewlêrê nûnertiya bazirganî ya Erebistana Siûdî hate vekirin

PeyamaKurd – Li Hewlêrê îro 19ê Îlonê bi merasîmekê nûnertiya bazirganiya Siûdî hate vekirin.

Hate ragihandin ku îro Pêncşemê bi beşdariya Balyozê Siûdî yê li Iraqê Ebdulezîz Elî Şemerî û berpirsê Odeya Bazirganî û Desteya Veberhênanê li Herêma Kurdistanê, bi merasîmeke îmzekirinê ofîsa nûnertiya bazirganiya Siûdî li Hewlêrê hate vekirin.

Serokê Desteya Veberhênan a Hikûmeta Herêma Kurdistanê Dr. Mihemed Şukrî li ser vekirina nûnertiya bazirganî ya Siûdî got: “Vekirina ofîsê gelek girîng e, ji ber deriyê zêdetir ê bazirganiya di navbera Siûdiyê û Herêma Kurdistanê de wê veke û hêsankariyeke zêde wê ji bo bazirganên herdu aliyan çêbike.”

Şukrî got: “Wê ofîs hêsankariyê ji bo bazirganan û veberhêneran û xwediyên kar û hatûçûna wan çêbike, wê ne tenê ji bo mijara hec û umreyê ji bo mijarên aborî û bazirganiyê jî deriyan veke.”

Balyozê Erebistana Siûdî Ebdulezîz Elî Şemerî, piştevaniya xwe ya ji bo bihêzkirina pêwendiyên bazirganî û aborî yên welatê xwe li gel Herêma Kurdistanê anî ziman û got: “Em amade ne ji bo anîna her tiştekî ku li Herêma Kurdistanê bê berhemanîn hemû hêsankariyan bikin.”