Dabînkerê çek û teqemeniyê yê DAIŞê li çola Enbarê hat girtin

PeyamaKurd – Dezgeha Ewlekariya Neteweyî ya Iraqê (INSS) ragihand ku di encama operasyoneke îstîxbaratî ya hûr û serkeftî de, serkirdeyekî payebilind ê DAIŞê bi navê kod "Ebû Sayil" sax hat girtin.

Ev kesê ku di nav rêxistinê de wekî "dabînkerê çekên giştî" dihat nasîn, li herêma Çola Enbarê ji aliyê yekîneyên dijî terorê ve hat desteserkirin. Operasyon li ser bingeha agahiyên krîtîk û îtirafên serokên din ên rêxistinê yên ku berê hatibûn girtin, hat encamdan.

Berdevkê Servîsa Ewlekariya Neteweyî Erşed Hekîm derbarê hûrgiliyên operasyonê de diyar kir ku bi saya lêpirsînên xaçerêyî, hêzên ewlehiyê karîn xwe bigihînin depoyeke mezin a cebilxaneyê.

Hekîm destnîşan kir ku bi girtina Ebû Sayil re, torên piştgiriya lojîstîkî ya DAIŞê li herêmê hatine deşîfrekirin û derbeke giran li şiyana êrîşkirinê ya rêxistinê ketiye.

Di dema operasyonê de, tevî girtina vî serkirdeyî, gelek çek û teqemeniyên ku rêxistinê ji bo êrîşên nû amade kiribûn, hatin desteserkirin. Dezgeha Ewlekariya Neteweyî tekez kir ku ji bo bêbandorkirina hemû şaneyên razayî yên li parêzgeha Enbarê û derdora wê, operasyonên wan bi awayekî bênavber û bi kordînasyoneke bilind berdewam dikin.