Macron: Pêşîniya me îstîqrar û serweriya Iraqê ye

PeyamaKurd – Serokkomarê Fransayê Emmanuel Macron, beriya Civîna Bilind a Yekîtiya Ewropayê ya li Brukselê, daxuyaniyên taybet dan Tora Medyayî ya Rûdawê û peyamên giring derbarê pêşeroja Iraqê û şerê Ûkraynayê de par ve kirin. Di bersiva pirsên nûçegihan Ala Şaliyê de, Macron bal kişand ser pêvajoya avakirina hikûmeta nû ya li Iraqê ku piştî pesendkirina encamên hilbijartinên 11'ê Mijdarê ketiye rojevê.

Serokê Fransayê bi zelalî diyar kir ku rojeva sereke ya Parîsê ya li hember Bexdayê li ser du stûnên bingehîn hatiye avakirin: "îstîqrar û serwerî". Macron piştgiriya xwe ji bo gelê Iraqê dubare kir û destnîşan kir ku bendewariya wan ji hikûmeta nû ew e ku aramiya welêt biparêze.

Li aliyê din, mijara sereke ya lûtkeya Ewropayê şerê Ûkraynayê bû. Macron ragihand ku ew li ser pakêteke nû ya darayî dixebitin da ku pêşbîniyeke xurt bidin Kîevê. Di vê çarçoveyê de, planek heye ku 247 milyar dolar ji mal û milkên cemidî yên Rûsyayê di nava du salan de ji bo Ûkraynayê bên bikaranîn. Macron diyar kir ku ew geşbîn e ku dê welatên Ewropayê li ser vê mijarê bigihîjin rêkeftinekê û tekez kir ku ew ê hem piştgiriya Ûkraynayê bikin û hem jî ji bo aştiyeke mayînde bixebitin.