NY biryara agirbestê li Ukraynayê pejirand

PeyamaKurd - Civata Giştî ya Neteweyên Yekbûyî (NY) biryarek pejirand ku banga agirbestê li şerê Rûsya-Ukraynayê dike, ku niha di sala xwe ya çaremîn de ye.

Di rûniştineke taybet a Civata Giştî ya NY de ku ji bo salvegera çaremîn a şerê Rûsya-Ukraynayê hate lidarxistin, dengdan li ser biryara ku ji hêla Ukraynayê ve hatî pêşkêşkirin û ji hêla 46 welatan ve hatî piştgirîkirin, hate kirin.

Biryara ku banga "agirbesteke tavilê, bêkêmasî û bê şert" li Ukraynayê dike, bi 107 dengan erê û 12 dengan li dijî hate pejirandin. 51 endaman bêalî man.

Biryara ku bandorên herêmî û cîhanî yên şer ronî dike, banga "guhertina hemî girtiyan, berdana hemî kesên ku bi neqanûnî hatine girtin û vegera sivîlan, tevî zarokan, yên ku bi zorê hatine koçber kirin an jî hatine derxistin" dike.

Biryarê piştgirîya "serwerî, serxwebûn, yekîtî û yekparçeyiya axa Ukraynayê, tevî avên wê yên herêmî" anî ziman û "fikara cidî li ser êrîşên Rûsyayê yên li ser sivîlan û binesaziya enerjiyê ya krîtîk" destnîşan kir.

Hêjayî gotinê ye ku DYA, ku ji dengdanê dûr ma, pêşniyarek pêşkêş kir ku beşek ji biryarnameyê ji yên din veqetîne û dengdanek cuda li ser wê were kirin.

Cîgira Nûnerê Daîmî yê DYA li NY, Tammy Bruce, got, "Bi dîtina me, hin gotinên di biryarnameyê de muhtemelen wê balê ji danûstandinên berdewam dûr bixe, ne ku piştgiriyê bide lêkolîna hemî rêyên dîplomatîk ên ku dikarin rê li ber aştiya mayînde vekin."