Artêşa Israîlê êrîşên asmanî li Sûriyê piştrast kir
PeyamaKurd – Artêşa Israîlê piştrast kir ku firokeyên şer ên Israîlî êrişî paytexta Sûriyê Şamê û parêzgeha Hemayê kirine, di heman demê de Wezareta Derve ya Sûriyê ragihand ku Balafirxaneya Hemayê gelek ziyan dîtiye û bi dehan sivîl û leşker birîndar bûne.
Li gor nûçeya ajansa fermî ya Sûriyê SANAyê, balafirên Îsraîlê derdora Avahiya Lêkolînên Zanistî ya li taxa Barza li Şamê û derdora navenda bajarê Hemayê kirin armanc.
Rojnameya Vatana ragihand ku balafirên Îsraîlê zêdetirî 14 êrîşên esmanî birin ser Balafirgeha Hemayê û navçeyên derdora wê.
Artêşa Îsraîlê di daxuyaniyekê de ragihand, doh di demjimêrên êvarê de balafirên şer ên Îsraîlê Balafirxaneya leşkerî ya Hemayê û Balafirxaneya leşkerî ya T4 li parêzgeha Humsê ya Sûriyê û herwiha jêrxaneya leşkerî ya li Şama paytext kirin armanc.
Wezareta Derve ya Sûriyê jî di daxuyaniyekê de ragihand: “Bi binpêkirina eşkere yasayên navdewletî û serweriya axa Erebî ya Sûriyê, hêzên Îsraîlî di nava 30 xulekan de êrişên asmanî li ser 5 deverên cuda li seranserî Sûriyê pêk anîn, di encama êrişan de Balafirxaneya leşkerî ya Hemayê bi temamî hat wêrankirin û bi dehan sivîl û leşker birîndar bûn.”
Wezaretê di daxuyaniyekê de got, "Dema ku Sûriye hewl dide ji bo jinûveavakirinê piştî 14 salên şer, ev êrîşên dubare beşek in ji hewla eşkere ya Israîlê ji bo vegerandina tundiyê li Sûriyê ji bo têkbirina hewlên vegerandina welat."
Di daxuyaniyê de bang li civaka navneteweyî hat kirin ku helwesteke tund nîşan bide û zextê li Îsraîlê bike ku dest ji êrîşên xwe berde û li gorî qanûnên navneteweyî û erkên xwe yên di çarçoveya Peymana Cûdabûna Desthilatan a sala 1974an de cih bigire.
Îsraîl ji 8ê Kanûna 2024an vir ve êrîşên esmanî li ser xalên leşkerî, depoyên cebilxane û alavên leşkerî yên artêşa Sûriyê ji rejîma Beasê ya hilweşandî pêk tîne.
