Artêşa Lubnanê di şerê Hizbullahê de bê cebilxane ma: Çav li alîkariya Amerîkayê ye

PeyamaKurd – Artêşa Lubnanê, di encama operasyonên ji bo jinavbirina depoyên çekan ên Hizbullahê li başûrê welêt, cebilxaneya xwe ya teqemeniyan bi dawî anî. Ev operasyon di çarçoveya peymana agirbestê ya bi Îsraîlê re tên kirin. Niha artêş ji bo berdewamkirina mîsyona xwe li benda alîkariyên leşkerî yên nû ji Amerîkayê ye.

Li gorî çavkaniyên ewlehiyê yên ku ji ajansa Reutersê re axivîn, tevî ku cebilxane xilas bûye jî, artêşê operasyonên lêgerîn û tespîtkirinê ranewestandiye û hewlên xwe li herêmên başûr zêde kiriye. Di hefteyên dawî de, neh depoyên nû yên çekan hatine dîtin, gelek tunel hatine girtin, û leşkerên zêdetir ji bo bicihbûnê li başûr tên perwerdekirin. Lê belê, ji ber kêmbûna teqemeniyan, hin depo hîn nehatine jinavbirin û tenê bi awayekî demkî hatine dorpêçkirin. Armanca artêşê ew e ku heta dawiya salê paqijkirina başûrê Lubnanê bi dawî bike, lê pêşveçûn li deverên din hêdîtir e.

Artêşa Lubnanê bi awayekî hestiyar tevdigere da ku li welêt nebe sedema aloziyeke siyasî. Ji ber vê yekê, operasyon tenê li depoyên Hizbullahê yên li başûrê welêt, ku nêzîkî sînorê Îsraîlê ne, tên kirin û dîmenên operasyonan nehatine weşandin.

Hizbullaha ku razî bûye çekên xwe li vê herêmê deyîne, bêçekkirina li herêmên bakur û rojhilatê welêt red dike. Rêxistin îdia dike ku agirbest tenê ji bo başûr derbasdar e û her pêngaveke bêçekkirinê li deverên din pêwîstî bi lihevkirineke siyasî heye. Hizbullah hişyarî dide ku her operasyoneke artêşê li van deveran bêyî lihevkirineke siyasî dikare bibe sedema nerazîbûn û pevçûnan di nav civaka Şîe de.

Di vê navberê de, rêveberiya Washingtonê piştgiriya xwe ya ji bo artêşa Lubnanê didomîne û daxwaz dike ku piştî operasyonên li başûr, pêvajoya bêçekkirinê li seranserê Lubnanê belav bibe.

Ev nivîs 33 car hatiye xwendin.