Axios: Koşka Spî bersiva Îranê ya nameya Trump dinirxîne
PeyamaKurd – Hate ragihandin ku Îranê piştî mehekê bersiva nameya Serokê Amerîkayê Donald Trump da û niha Koşka Spî naveroka wê nameyê dinirxîne.
Hate diyarkirin ku Tehran bersiva nameyê ya destpêkirina hevdîtinên bo bernameya nukleerî daye, lê bi mercê danûstandinên nerasterast razî bûye hevdîtina ligel Amerîkayê bike.
Malpera Axiosê ya Amerîkî bi zarê berpirsekî Amerîkî ragihandiye, “Bersiva Komara Îslamî ya Îranê ji bo nameya Serokê Amerîkayê Donald Trump gihîştiye Koçka Spî.”
Berpirsê Amerîkî gotiye, tevî ku Trump di nameya xwe de daxwaza danûstandinên rasterast ji Rêberê Bilind ê Îranê kiribû jî Îranê tenê li ser wê yekê razî bûye ku bi navbeynkariya Umanê tevlî danûstandinên nerasterast bibe.
Berpirsên Amerîkî dane zanîn ku beşek ji rêveberiya Koşka Spî di wê baweriyê de ye ku hê jî hêvî heye bi rêya danûstandinan bi Îranê re lihevkirin bê kirin, lê hinek jî dibêjin, tê fêdeya danûstandinan tuneye û piştevaniya êrîşkirina ser navendên atomî yên Îranê dikin.
Berpirsê Amerîkî Axiosê re gotiye, “Trump naxwaze bi Îranê re bikeve nav şer, lê baweriya wî wiha ye ku bi zêdekirina hêzê û pêşxistina şiyanên leşkerî li deverê dikare hevsengiya şiyanan û hêzê çêbike, ji bo ku Îranê neçar bike û bi awayekî bihêz dest bi danûstandinan bike.”
Herwiha wî berpirsî diyar kiriye, “Niha Koçka Spî li gel komkirina zêdetir hêzê li Rojhilata Navîn e, bi hûrî lêkolînê li ser pêşniyara Tehranê ji bo danûstandinên nerasterast dike.”
Ev nivîs 67 car hatiye xwendin.
