Naveroka rêkeftina li ser taxên Kurdan li Helebê hate ragihandin

PeyamaKurd – Encûmena Giştî ya Taxên Şêx Meqsûd û Eşrefiyê yên Helebê madeyên rêkeftina ligel hikûmeta demkî ya Sûriyê bi raya giştî re parve kirin.

Daxuyaniya ku li ber Taxa Zeytîn a Taxa Eşrefiye hat xwendin, nûner û endamên meclîsê û hêzên leşkerî yên her du taxan amade bûn.

Peymana ku bi giştî ji 14 xalan pêk tê wiha ye:

1. Taxên Şêx Meqsûd û Eşrefiyê ku piraniya wan Kurd in, weke taxên bajarê Helebê tên hesibandin û ji aliyê îdarî ve girêdayî wan in. Parastin, rêzgirtin û nepeniya civakî û çandî ya şêniyên van her du taxan ji bo pêşxistina jiyana hevbeş a aştiyane pêwîst e.

2. Hikmên vê peymana demkî heta ku Komîteyên Navendî yên Hevbeş li ser çareseriyeke domdar li hev nekirin, wê bên bicihanîn.

3. Wezareta Karên Hundir bi hevkariya hêzên Ewlekariya Hundirîn ji parastina şêniyên her du taxan û pêşîgirtina li her êrîş û rûbirûbûna wan berpirsyar e.

4. Bi armanca dabînkirina aştiya sivîl û ewlekariya sivîlan, xwepêşandanên çekdarî li du taxan hatine qedexekirin û bikaranîna çekan li her du taxan ji bo hêzên ewlekariya navxweyî yên girêdayî Wezareta Navxwe hatiye sînordarkirin.

5. Heta ku ewlehî û aramî li her du taxan pêk neyê, wê bendên axê yên li ser rêyên giştî bên rakirin û xalên kontrolê yên sereke wê di bin kontrola hêzên Ewlekariya Hundirîn ên girêdayî Wezareta Navxwe de bimînin.

6. Hêzên leşkerî û çekên wan wê ji herdu taxên rojhilatê Firatê vekişin.

7. Her yek li taxa Eşrefiye û taxa Şêxmeqsûd 2 navendên ewlekariya navxweyî hatin avakirin.

8. Mafê tevgera azad ji şêniyên her du taxan re hatiye misogerkirin û dadgehkirina her kesê ku beriya peymanê tê xwestin û destên wî di xwîna Sûriyeyiyan de tuneye, qedexe ye.

9. Ji bo hêsankirina çûnûhatinê di navbera bajarê Helebê û herêmên Bakur û Rojhilatê Sûriyê de, komîteyeke hevrêziyê bê avakirin.

10. Li her du taxan ji bo pêkanîna peymanê li qadê komîte bên avakirin.

11. Rêxistinên sivîl ên ku li her du taxan cih digirin, bi rêxistinên sivîl ên taxên din ên Helebê re bê cudahî kar dikin û bi rêya du şaxên şaredariyê yên ku li her du taxan in, xizmetê ji rêxistinên sivîl re pêşkêş dikin.

12. Divê her du aliyên parêzgeha Helebê zindanên xwe vala bikin û hemû girtiyên ku piştî rizgarkirinê hatine girtin biguherînin.

13. Nûnertiya tam û dadperwerane ya taxan di Encûmena Parêzgeha Helebê, Odeyên Bazirganî û Pîşesazî û hemû deverên din de li gor yasayên di meriyetê de tê dayîn.

14. Parastina saziyên xizmetguzarî, îdarî û perwerdeyî, şaredarî û meclîsên xwecihî li her du taxan heta ku komîteyên navendî yên hevbeş li ser çareseriyeke mayînde li hev bikin.

Ev nivîs 52 car hatiye xwendin.