Pêşnimêjekî Rejîma Îranê yê li Merîwanê: Diranên organîzatorên Newrozê bi pehînan hûr bikin

PeyamaKurd – Mistefa Şîrzadî, pêşnimêjê xudbeyê yê bajarê Merîwanê Rojhilatê Kurdistanê, ku ji aliyê rêberê Îranê Elî Xamineyî ve hatiye peywirdarkirin, di xutbeya roja Înê ya 28ê Adara 2025an de gefên tund li nîştecihên Merîwanê, bi taybetî jî li gundiyên “Nê”yê xwarin. 

Saziya Mafên Mirov a Hengawê ragihand ku Mistefa Şîrzadî, ku wekî kesekî nêzî saziyên ewlehî û olî yên rejîma Komara Îslamî ya Îranê tê naskirin, bi tundî li dijî pîrozbahiyên Newrozê derket û ”fetwa”yek li dijî pîrozbahiyên Newrozê da.

Li gorî raporeke Hengawê, wî di axaftina xwe de ciwanên Merîwanê û organîzatorên pîrozbahiya Newrozê ya li gundê “Nê” kirine hedef û got: 

“Divê Misilman diranên van kesan bi pehînan hûr bikin û hemûyan bixine girtîgehê.” 

Hengawê bi bîr xist ku beriya pîrozbahiya Newrozê li gundê “Nê”yê Merîwanê, roja 24ê Adara 2025an, herî hindik 7 Kurdistanî bi destê hêzên Îtaleatê (dîsîplîn) ve hatine desteserkirin ku nasnameya wan jî bi vî awayî ye:

Aram Nîkpey, Mihemed Nîkpey (du kes bi heman navî), Mihemed Eştek, Keywan Mînûyî, Keyhan Tedbîrî (17 salî), û Kawe Dastan. 

Her weha amaje bi wê yekê tê kirin ku bi dehan kesên din jî ji bo navendên ewlehiyê hatine gazîkirin û rastî lêpirsîn û gefan hatine.

Hengaw di dawiya raporê de li ser vî pêşnimêjê rejîmê dibêje ku piştî kuştina kurê wî ya di sala 2009an de, bi hevkariya saziyên ewlehî yên Îranê kiribû ku 2 girtiyên siyasî yên Kurd, Zanyar û Luqman Muradî bên bidarvekirin. 

Her du girtî, li gel Ramîn Husên Penahî, di 7ê Îlona 2020an de li girtîgeha Recayî Şehr a Kerecê hatin bidarvekirin û pêvajoya dadgehkirina wan bi tevahî bi guman û dûrî hiqûqê bû, parêzerê wan Salih Nîkbext jî ragihandibû ku tu delîlên berbiçav ji bo sûcdarkirina wan tune ne.

Ev nivîs 56 car hatiye xwendin.