Mîranî: Armanca Serok Barzanî û PDKyê, her tim pêkvejiyan û parastina mafên pêkhateyên li Kerkûkê bûye
PeyamaKurd – Berpirsê Desteya Kargêrî ya Polîtburoya Partiya Demokrat a Kurdistanê (PDK) Fazil Mîranî ragihand, “Em nehatine Kerkûkê, lê em li Kerkûkê bûn û emê li Kerkûkê bimînin.”
Fazil Mîranî, îro, 5ê Nîsanê, di merasîma vekirina baregeha Kerkûk-Germiyanê ya Partiya Demokrat a Kurdistanê (PDK) de got:
“Bi rastî em nehatine Kerkûkê, lê em li Kerkûkê bûn û dê li Kerkûkê jî bimînin.”
Her weha diyar kir, “Bîr û baweriya Kurd ku her tim bîr û baweriya PDKyê bûye, koka wê li Kerkûkê hebûye û roj bi roj zêdetir dibe. Ev zêdebûn, ji ber hişmendiya neteweyî ye, ne ji ber zêdebûna hejmara endamên partiyê ye, ji ber ku em li hundir behsa xebatên partiyê dikin, lê li derve behsa neteweperweriyê dikin.”
Berpirsê Desteya Kargêrî ya Polîtburoya PDKyê pê de çû:
“Serok Mesûd Barzanî û PDK her tim armanca wan, pêkvejiyan, biratî û parastina mafên pêkhateyên li Kerkûkê bûye. Di dema êrişên DAIŞê de, pêkhateyên Kerkûkê bang li Serok Mesûd Barzanî kir ku Pêşmerge Kerkûkê biparêzin, ji bo ku nebe weke Mûsilê.”
Wî her weha tekez kir ku PDK rijd e li ser pêdeçûnê di xwe de bike, ew yek pêwîst e ji bo yekrêzî û yekhelwêstiya Kurdistanî, ji bo peydakirina vegera hêzên Kurdistanê, bilezkirina karê Parlamentoya Kurdistanê û pêkanîna hikûmeta nû.
Piştî bûyerên 16ê cotmeha 2017an, baregeha Parêzgeha Kerkûk-Germiyan a Partiya Demokrat a Kurdistanê, (PDK) îro, li Kerkûkê hat vekirin.
Ev nivîs 46 car hatiye xwendin.
