پەیامی کورد   ...   چین و ژاپۆن و کۆریای باشوور ڕێککەوتن لەسەر بەرپەرچدانەوەی سیاسەتەکانی ترامپ

لە سەروبەندی دانانی باجی جیهانی ترامپ، بەرپرسانی کۆریای باشوور و چین و ژاپۆن یەکەمین گفتوگۆی ئابووری خۆیان لە ماوەی پێنج ساڵدا ئەنجامدا.
بەگوێرەی ڕاپۆرتێک ، لەگەڵ نزیکبوونەوەی وادەی باجی تۆڵەسەندنەوەی جیهانی ترامپ، سەرکردەکانی کۆریای باشوور، ژاپۆن و چین ڕۆژی یەکشەممە گەیشتنە ڕێککەوتن بۆ زیادکردنی بازرگانی ناوچەکە.

بەم پێیە، لە میانی گفتوگۆکەدا، بەرپرسانی بازرگانی ئەم سێ ووڵاتە ئاسیاییە داوای ئاسانکاری و بەرەوپێش بردنی بازرگانی ناوچەکەیان کرد بۆ بەرەنگاربوونەوەی ئەو باجە نوێیانەی کە ئیدارەی ترامپ ڕایانگەیاندووە، کە بڕیارە لە ٢ی نیسانەوە بچێتە بواری جێبەجێکردنەوە، بەپێی بەیاننامەیەک کە دوای کۆبوونەوەکە بڵاوکرایەوە، وەزیرانی بازرگانی هەرسێ ووڵات ڕێککەوتوون لەسەر ئەوەی لە نزیکەوە کاربکەن بۆ ئەنجامدانی گفتوگۆی تۆکمە و گشتگیر لەسەر ئاستی باڵا لەسەر بنەمای ڕێککەوتنی بازرگانی ئازادی سیئۆل-تۆکیۆ-بێجی، لەگەڵ ئامانج لە پێشخستنی بازرگانی ناوچەیی و جیهانی.

هاوکات وەزیری بازرگانی کۆریای باشوور ڕایگەیاند کە پێویستە هاوکاری بازرگانی بەهێز بکرێت کە هەر سێ ووڵات تێیدا بەشداربن و چوارچێوەیەک بۆ فراوانکردنی هاوکاری بازرگانی نێوان هەر سێ ووڵات لە ڕێگەی دانووستانی بازرگانییەوە پێک بهێندرێت.

هەرچەندە ئەم سێ ووڵاتە لە هەندێک بابەتی ناوچەییدا جیاوازییان لەگەڵ یەکتردا هەیە، بەڵام هەر سێ ووڵات هاوبەشی سەرەکی بازرگانی ئاسیای ئەمریکان.

بڕیارە دیالۆگی بازرگانی داهاتووی نێوان هەر سێ ووڵات لە ژاپۆن بەڕێوە بچێت.
لە ساڵی ٢٠١٢ەوە کە گفتوگۆکان دەست یپێکردووە، پێشکەوتنی بەرچاویان لەسەر ڕێککەوتنی بازرگانی ئازادی سێ قۆڵی بەدەست نەهێناوە، بەڵام لەگەڵ نزیکبوونەوەی وادەی ٢ی نیسان، هەوڵەکانیان بۆ زیادکردنی هاوکارییە بازرگانییەکان چڕتر بووەتەوە.

ترامپ هەڕەشەی سەپاندنی باجی تۆڵەسەندنەوە لە سەر ئاستی جیهان لە 2ی نیسانەوە دەکات و هۆشداریشی داوە کە هەموو ووڵاتێک هەمان ئەو باجانە هەڵدەگرێت کە لەسەر کاڵا ئەمریکییەکان دەیسەپێنێت.

لە هەمان کاتدا دۆناڵد ترامپ دوێنێ داوای ڕێبازێکی شەڕانگێزانە لەلایەن ڕاوێژکارەکانییەوە سەبارەت بە باجەکان کرد.

سەپاندنی باج لەسەر ئەو بەرهەمانەی هاوردە دەکرێن بۆ ئەمریکا، بەشێکە لە هەوڵەکانی دۆناڵد ترامپ بۆ زیادکردنی بەرهەمی بەرهەمە ئەمریکییەکان و کەم کردنەوەی کورتهێنانی بازرگانی ووڵات.

سیاسەتەکانی گومرگی ترامپ یەکێک بووە لە گرینگترین شتەکانی سەرۆکایەتییەکەی، ئەمەش بووەتە هۆی دروستبوونی گرژی لە نێوان واشینتۆن و هەندێک لە هاوبەشە بازرگانییە گرینگەکانیدا.