بڕیارە ڕێبەر ئەحمەد لە بەریتانیا ووتارێک پێشکەش بکات

پەیامی کورد ... بڕیارە ڕێبەر ئەحمەد لە بەریتانیا ووتارێک پێشکەش بکات
وەزیری ناوخۆی هەرێمی کوردستان بۆ بەشداری لە لووتکەی ئاسایشی سنوور، لە بەریتانیایە و گوتارێک پێشکەش دەکات.
ڕێبەر ئەحمەد، وەزیری ناوخۆی حکوومەتی هەرێمی کوردستان، بە یاوەری ژمارەیەک بەرپرسی حکوومی، لەسەر بانگهێشتنامەی فەرمی وەزارەتی ناوخۆی حکوومەتی بەریتانیا، بۆ بەشداری لە لووتکەی ئاسایشی سنوور، لە لەندەنە.
لووتکەی ئاسایشی سنوور دووشەممە، 31-03-2025، بە فەرمی دەست بە کارەکانی دەکات و دوو ڕۆژ دەخاێنێت. وەزیرانی ناوخۆ و داد و بەرپرسانی ئاسایشی سنووری ژمارەیەکی زۆری ووڵاتان تێیدا بەشدا دەبن.
لە ڕۆژی یەکەم دا، کیێر ستارمەر، سەرۆک وەزیرانی بەریتانیا ووتاری کردنەوەی لووتکەکە پێشکەش دەکات و دواتر بەرنامەکانی لووتکە دەست پێ دەکات.
بڕیارە لە پەنێڵی یەکەم دا کە وەزیری ناوخۆی بەریتانیا سەرپەرشتی دەکات، ڕێبەر ئەحمەد، وەزیری ناوخۆی حکوومەتی هەرێمی کوردستان یەکێکە لە پانێلیستەکان و ووتارێک پێشکەش بکات.
وەزیری ناوخۆی حکوومەتی هەرێمی کوردستان ئێوارەی ڕۆژی یەکشەممە، 30-03-2025، لە ڕێورەسمی پێشوازی بۆنەکە، لەگەڵ ییڤیت کوپەر، وەزیری ناوخۆی بەریتانیا کۆبووەوە.
هەمان ڕۆژ، ڕێبەر ئەحمەد لەگەڵ وەزیری ناوخۆی حکوومەتی فیدراڵی عێراق، وەزیری ناوخۆی ئاڵمانیا، وەزیری کۆچی هۆڵەندا، وەزیری دادی سوید، وەزیری کۆچی چین، وەزیری ناوخۆی بولگاریا، ژمارەیەک وەزیر و بەرپرسانی پایەبەرزی سنوور و ئاسایشی ووڵاتانی دیکە کۆبووەوە.
ئەم بابەتە 16 جار خوێندراوەتەوە




