Aloziyên Amerîka û Îranê: Amerîka kapasîteya leşkerî li Rojhilata Navîn zêde dike
PeyamaKurd – Berdevkê Pentagonê Sean Parnell ragihand ku wan ji bo “bipêşxistina îstiqrarê, pêşîgirtina li tevgerên êrîşkar û parastina herikîna azad a bazirganiyê” li Rojhilata Navîn çalakî pêk anîn.
Parnell diyar kir ku li gorî talîmata Wezîrê Parastinê Pete Hegseth dê kapasîteya leşkerî ya Amerîkayê li Rojhilata Navîn were zêdekirin.
Parnell diyar kir ku dê balafirên şer ên din li herêmê bên bicihkirin û bi vî awayî hêza parastina hewayî ya Amerîkayê zêde bibe.
Parnell ragihand ku Wezîr Hegseth got ku “Eger Îran berjewendiyên Amerîkayê yên li herêmê tehdîd bike ew ê gavan bavêjin.”
Serokê Amerîkayê Donald Trump jî di 7ê Adarê de ragihandibû ku wî nameyek ji rêberê Îranê Ayetullah Elî Xamineyî re nivîsandiye û hem gef lê xwariye û hem jî daxwaza danûstandinan kiriye.
Xamineyî jî gotibû:
“Amerîka naxwaze bi daxwaza danûstandinê pirsgirêkan çareser bike, lê dixwaze daxwazên xwe ferz bike û serweriyê pêk bîne û Îran vê yekê qebûl nake.”
Name piştî çend rojan ji aliyê Îmaratên Erebî yên Yekbûyî ve radestî Îranê hat kirin û Îranê jî ragihand ku di 27ê Adarê de bi rêya Omanê re bersiva xwe ji vê nameyê re şandiye.
Wezîrê Derve yê Îranê Ebas Araqçî ragihand, heta ku Trump gefên xwe bidomîne ew ê rasterast bi Amerîkayê re hevdîtinan nekin û da zanîn ku ew ji bo hevdîtinên nerasterast bi navbeynkaran amade ne.
Araqçî diyar kir ku berevajî daxwaza Trump, ew ê tenê li ser mijara nukleerî danûstandinan bikin û mijara kapasîteya berevaniyê ya welatê wî ji mizakereyê re vekirî nîne.
Trump di daxuyaniya xwe ya ji bo medyaya welêt de gefa bombebarankirina Îranê xwar, “Weke ku heta niha nehatiye dîtin” eger Îran bi Amerîkayê re li hev neke.
Rêberê Îranê Xamineyî jî got, ew tu îhtîmalekê nabînin ku Trump gefên xwe yên êrîşê bi cih bîne, lê ew ê bi tundî bersiva her êrîşekê bidin.
Ev nivîs 43 car hatiye xwendin.
