Medvedev helwêsta Trump a li dijî Rûsyayê wek "ragihandina şer" bi nav kir
PeyamaKurd – Cîgirê Serokê Konseya Ewlehiya Rûsyayê, Dîmîtrî Medvedev, îro Pêncşemê bi daxuyaniyeke tund bersiv da biryarên dawî yên rêveberiya Serokê DYE Donald Trump, û ragihand ku ev gavên Washingtonê "kiryareke şer" in. Ev bertek piştî ku Amerîkayê lûtkeya plankirî ya li Budapeştê betal kir û cezayên nû li ser şîrketên petrolê yên Rûsyayê sepand, hat.
Medvedev, ku di heman demê de serokkomarê berê yê Rûsyayê ye, li ser hesabê xwe yê Telegramê nivîsand: "Amerîka dijminê me ye û 'qasidê aştiyê' yê wan ê axaftvan niha bi tevahî ketiye rêya şer li dijî Rûsyayê."
Wî di dewama peyama xwe de got, "Biryarên hatine girtin kiryarek şer e li dijî Rûsyayê. Trump niha xwe bi Ewropayek ku bi tevahî dîn bûye, girêdaye."
Ev daxuyanî di demekê de tê ku hefteya borî, Koşka Spî bi awayekî fermî ragihand ku lûtkeya di navbera serokên her du welatan de li Budapeştê hatiye betalkirin. Di heman demê de, cezayên aborî yên nû li dijî sektorên girîng ên enerjiyê yên Rûsyayê hatin ragihandin. Washingtonê ev pêngav weke bersivek li hember kiryarên Rûsyayê li Ukraynayê û polîtîkayên wê yên ku ewlehiya enerjiya Ewropayê dixe xeterê, bi nav kir.
Alozî di navbera Moskow û Washingtonê de bi van geşedanên dawî re ketiye qonaxeke nû û nirxandinên ku têkiliyên her du welatan di asta herî xirab de ne ji serdema Şerê Sar vir ve, careke din piştrast dike.
Ev nivîs 24 car hatiye xwendin.
