Fransa kapasîteya serederîkirina rewşên awarte ya Herêma Kurdistanê xurt dike
PeyamaKurd – Ajansa Fransî ya Pêşveçûna Navneteweyî, Expertise Franceyê piştgiriya xwe ya ji bo zêdekirina kapasîteya bersivdayîna krîzan a Navenda Hevbeş a Koordînasyona Krîzan (JCC) ya Hikûmeta Herêma Kurdistanê didomîne.
JCCê ragihand ku karmendên wê dewreya duyemîn a perwerdehiya rêveberiya rîskê û sîstemên agahiyên erdnîgarî (GIS) bi serkeftî temam kirine, ku vê yekê şiyana wan a amadekariyê ji bo karesatan bilind kiriye.
Rêvebera Giştî ya JCC, Sirwa Resûlê ji Kurdistan Chronicleê re diyar kir ku proje, piştî peymaneke hevbeş a di navbera Wezareta Karên Navxwe û Expertise Franceyê de di Kanûna 2024an de, dest pê kiriye. Armanc kêmkirina rîskên karesatan û xurtkirina bersivdayîna awarte ye.
Di vê çarçoveyê de, tîmeke taybet a rizgarkirina avê tê avakirin, ku li Fransayê perwerdehiyeke berfireh, tevî tetbîqatên li çeman dibîne. Ev tîm dê li gorî standardên navneteweyî were çekdarkirin û perwerdehiyê li personelên parastina sivîl li herêmê belav bike.
Herweha, raporeke nirxandina rîskê ya berfireh bi karanîna teknolojiya GISê tê amadekirin, ku deverên xeternak û stratejiyên destwerdanê diyar dike. 6 astên perwerdehiyê ji bo sala 2025an hatine plan kirin; 2 ji wan temam bûne, ya 3yem jî berdewam dike. Perwerdehiya hişyariya lehiyê, sazkirina konteynerên simulasyona agir, nûjenkirina wesayîtên bersivdayîna krîzê, û perwerdehiya mobîl li deverên gundewarî jî dewam dikin.
Di 20ê Tîrmehê de, Konsulê Giştî yê Fransayê yê li Hewlêrê Yann Braem û Wezîrê Karûbarên Navxwe yê Herêma Kurdistanê Rêber Ehmed beşdarî merasîma radestkirina alavên agirkujiyê û rizgarkirina lehiyê bûn ku ji aliyê Fransayê ve hatine dabîn kirin.
Ev nivîs 76 car hatiye xwendin.
