پەیامی کورد   ...   تام كاتن : پێویستە ئەورووپا سزا گەڕێندراوەكان لە دژی کۆماری ئیسلامی بە تەواوی جێبەجێ بکات

تام کاتن، سیناتۆری کۆماریخوازی ئەمریکا، بە پێشوازی لە بڕیاری فەرەنسا، ئاڵمانیا و بەریتانیا بۆ چالاککردنی میکانیزمی ماشە دژی ئێران، لە تۆڕی کۆمەڵایەتی ئێکس نووسیویەتی: "نابێت هەرگیز ڕێگە بە ڕێژیمی ئێران بدرێت کە چەکی ئەتۆمی بەدەست بهێنێت. ئایەتوڵڵاکان بە ڕوونی نیشانیان داوە کە هیچ نیازێکیان نییە دەستبەرداری بەرنامە ئەتۆمییەکانیان بن، سەرەڕای ئەو لێدانە قورسەی كە لە لایەن ئەمریكا و ئیسڕائیل ەوە بە بەرنامە ئەتۆمییەکەیان كەوتووە”.

کاتن جەختی لەوە کردەوە کە جێبەجێکردنی ئەو گەمارۆیانە سەرچاوە داراییەکانی کۆماری ئیسلامی بۆ دابینکردنی "تۆڕی تیرۆریستی و دروستکردنی مووشەکی بالیستیک" دەبڕێت.

ناوبراو داوای لە هاوپەیمانە ئەورووپییەکان کرد لە ماوەی ٣٠ ڕۆژی داهاتوودا سزاکانی تۆڵەسەندنەوە بە تەواوی جێبەجێ بکەن.

بە ووتەی ناوبراو پێویستە سیاسەتی هاوبەشی ئەمریکا و ئەورووپا لەسەر "هەڵوەشاندنەوەی تەواوەتی بەرنامە ئەتۆمییەکەی ئێران و وازهێنان لە كردەوەی تیرۆریستی" بەردەوام بێت.