پەیامی کورد   ...   بەڕێوبەری گشتی تۆمارکردنی خانووبەرەی هەرێم هەژماری زەوی تاپۆکراو ڕادەگەێنێت

بەڕێوبەری گشتی تۆمارکردنی خانووبەرەی هەرێم ئاماژەی بۆ ئەوە کرد "لە چوار ساڵی ڕابردوو ٨٠ هەزار زەوی کارت تاپۆ کراون، پێم وایە کەم کردنەوەی ڕسوومات لەسەر زەوی کاریگەری لەسەر هاووڵاتییان هەبووە."

د.لوقمان عومەر، بەڕێوبەری گشتی تۆمارکردنی خانووبەرە ڕایگەیاند "لە چوار ساڵی ڕابردوو 80 هەزار پارچە زەوی لە کارتەوە کراونەتە تاپۆ، نزیکەی 10 هەزار پارچە زەوی کارت ماوە، ئەوانیش کاریان لەسەر دەکرێت بکرێنە سەنەد، ئەو زەویانەی ماون زیاتر لە قەزا و ناحیەکانن، ڕێژەیەکی زۆر کەم لەناو شارە گەورەکان ماوە، پرۆسەی تاپۆکردنیش بۆ ئەو زەویانەی پێشتر کارت بوونە بەردەوامە."

بەڕێوبەری گشتی تۆمارکردنی خانووبەرەی هەرێم ووتی "کەم کردنەوەی ڕەسمی سەر زەوی کاریگەری لەسەر جووڵەی بازاڕی زەوی پەیداکردووە، چوونکە کاتێک حکوومەت ڕسووماتی سەر زەوی لە 3% کەمکردەوە بۆ 1%، کاریگەری لەسەر کڕین و فرۆشتن و بەناوکردنی زەوی کردووە."

د.لوقمان عومەر ئاماژەی بۆ ئەوە کرد "بڕیارەکەی حکوومەت بۆ کەمکردنەوەی ڕسوومات لەسەر زەوی، لە بەرژەوەندی هاووڵاتییانە، ئێستا بەهۆی بڕیارەکەی حکوومەتی هەرێمی کوردستان خەڵک زیاتر دێنە پێشەوە بۆ مامەڵەی زەوی وزار، ئەوەش نیشانەی لایەنی ئەرێنی بڕیارەکەی حکوومەتە لەسەر هاووڵاتییان."