پەیامی کورد   ...   وەزارەتی کارەبا و سامانە سرووشتییەکان ڕاگەێندراوێکی هاوبەش بڵاو دەکەنەوە

بەهۆی پڕۆسەی سازدانەوە و چاکسازی لە کێڵگەی کۆڕمۆر، ئاستی خزمەتگوزاری کارەبا لە وەرزی هاوین دا بەشێوەیەکی بەرچاو بەرز دەبێتەوە.

پێنجشەممە، 03-04-2025، هەردوو وەزارەتی کارەبا و سامانە سرووشتییەکانی حکوومەتی هەرێمی کوردستان، ڕاگەێندراوێکی هاوبەشیان لەبارەی پرۆسەی چاکسازی لە کێڵگەی کۆرمۆر و باشترکردنی خزمەتگوزاری کارەبا لە وەرزی هاویندا بڵاو کردەوە. 

لە ڕاگەێندراوەکەدا ئاماژە بەوە کراوە، "بە مەبەستی ئامادەکاری بۆ هاتنی وەزی هاوینی ئەمساڵ، کۆمپانیای (دانا گاز) دەست بە پڕۆسەی سازدانەوە و چاکسازی لە کێڵگەی کۆڕمۆر دەکات. ئەم پرۆسەیە لە کاتژمێر 12:00ـی ئەمشەوی پێنجشەممەوە، 03-04-2025، دەست پێ دەکات و سێ هەفتە دەخاێنێت."

باس لەوەش کراوە، "هەریەک لە وەزارەتی کارەبا، وەزارەتی سامانە سرووشتیەکان و کۆمپانیای (دانا گاز) هەماهەنگی نزیکیان دەبێت بۆ ئەوەی پڕۆسەکە بەشێوەیەکی سەرکەوتوو ئەنجام بدرێت."

هەردوو وەزارەتەکە ئەوەشیان خستووەتە ڕوو، چاوەڕوان دەکرێت لە ڕێگەی پڕۆسەی سازدانەوە و چاکسازی لە کێڵگەی کۆڕمۆر، ئاستی خزمەتگوزاری کارەبا لە وەرزی هاوین دا بەشێوەیەکی بەرچاو بەرزبێتەوە.

ئەمە لە کاتێکدایە، هەر پێنجشەممە، کۆمپانیای دانا گازی ئیماراتی لە ڕاگەێندراوێکدا ئاشکرای کرد،  لە سەرەتای مانگی ئادارەوە ئاستی بەرهەمهێنانیان لە کێڵگەی کۆرمۆر بۆ 525 ملیۆن پێ سێجای ڕۆژانە بەرز کردووەتەوە. بە گوێرەی ڕاگەێندراوەکە، ئاستی بەرهەمهێنان لەو کێڵگەیەدا لە ساڵی 2017ـەوە بە ڕێژەی 75% زیادی کردووە، ئەمە جیا لە 15 هەزار و 200 بەرمیلی لە پێکهاتەی خەستبووی گازەکە، هەزار و 70 تۆنی ڕۆژانە لە پێکهاتەی دیکە کە بەگازی نەوتی ناسراوە بەرهەم دەهێنرێت.