پەیامی کورد   ...   زانیاری سەبارەت بە کارکردن لە بەندئاوی دوین 

لە ١٦ـی ئەیلوولی ٢٠٢٤، لەلایەن مەسروور بارزانی، سەرۆکی حکوومەتی ھەرێمی کوردستان پڕۆژەی بەنداوی دوین کە پڕۆژەیەکی ستراتیژی و گرینگی سنووری پارێزگای ھەولێرە بە گوژمەی (٨٨ ملیار دینار) بەردی بناغەی دانراو ئێستاش کارکردن تێیدا بەردەوامە.

بەندئاوی دوین، کە بە شێوازی کۆنکریتی RCC دروست دەکرێت، ٣٢٠ مەتر درێژی و ٧٥ مەتر بەرز دەبێت. توانای گلدانەوەی ١٠٠ ملیۆن مەتر سێ جا ئاوی ھەیە، ئەو بەندئاوە جگە لە پەرەپێدانی سامانی ئاو و پاراستنی ئاوی ژێرزەوی و کشتوکاڵ، دیمەنێکی جوان بە ناوچەی گەشتیاری دوین دەبەخشێت و جووڵەی گەشتیاری لە ناوچەکەدا زیاد دەکات.

ھاوکات لەسەر ڕاسپاردە و فەرمانی مەسروور بارزانی، سەرۆکی حکوومەتی ھەرێمی کوردستان، ناوچەی شوێنەواری دوین، کە ٤٠ کیلۆمەتر لە باکووری شاری ھەولێرەوە دوورە و دەکەوێتە سەر دەربەندی کۆڕێ و مێژووی قەڵاکەی دەچێتەوە سەدەی شانزەیەمی زایینی نۆژەن دەکرێتەوە.

جێگەی باسە، کابینەی نۆیەمی حکوومەتی ھەرێمی کوردستان، گرینگی و بایەخێکی کەم وێنە و زۆری بە پرۆژەکانی بەندئاو و درووستکردنی پۆند داوە، جگە لە کارکردن لەو بەندئاوە، لە ساڵی ڕابردووش دا ھەرچوار بەندئاوی ( گۆمەسپان، چەمرگە، ئاقووبان، بەستۆڕە ) لە سنووری پارێزگای ھەولێر تەواوکران، کە سوودی زۆریان ھەیە بۆ بەگژداچوونەوەی ووشکەساڵی و کەم ئاوی و ئاودێری و کشتوکاڵ و گەشتیاری و زیادکردنی ئاوی ژێر زەوی.