سه‌رۆكی حکوومەت پێشوازى له نوێنه‌رى تایبه‌تی سكرتێرى گشتی نه‌ته‌وه یه‌كگرتووه‌كان له عێراق كرد
پەیامی کورد ... سه‌رۆكی حکوومەت پێشوازى له نوێنه‌رى تایبه‌تی سكرتێرى گشتی نه‌ته‌وه یه‌كگرتووه‌كان له عێراق كرد
سەرۆکی حکوومەتی ھەرێمی کوردستان لەگەڵ نوێنەری تایبەتی سکرتێری گشتی نەتەوە یەکگرتووەکان کۆبووەوە و ھەردوولا ھاوڕابوون لەسەر گرینگی ڕێزگرتن لە مافە دەستوورییەکانی خەڵکی کوردستان و قەوارەی فیدراڵی ھەرێمی کوردستان.
سێشەممە ٤ـی شوباتی ٢٠٢٥، مەسروور بارزانی، سەرۆکی حکوومەتی ھەرێمی کوردستان، پێشوازی لە محەممەد حەسسان نوێنەری تایبەتی سکرتێری گشتی نەتەوە یەکگرتووەکان لە عێراق و سەرۆکی نێردەی ( UNAMI) کرد.
لە کۆبوونەوەکەدا، بیروڕا لەبارەی بارودۆخی گشتی عێراق و ناوچەکە و پێویستی چارەسەرکردنی کێشەکانی نێوان ھەرێمی کوردستان و حکوومەتی فیدراڵ ئاڵوگۆڕ کرا.
ھەردوولا ھاوڕابوون لەسەر گرنگیی ڕێزگرتن لە مافە دەستوورییەکانی خەڵکی کوردستان و قەوارەی فیدراڵی ھەرێمی کوردستان. ھەروەھا ھەموارکردنی یاسای بوودجەی فیدراڵ لەلایەن ئەنجوومەنی نوێنەرانەوە، بە ھەنگاوێکی ئەرێنی بە ئاراستەی چارەسەرکردنی کێشەکان دانرا.
سەرۆکی نێردەی یوونامی لە عێراق، ڕۆڵی سەرۆک بارزانی و سەرۆکی حکوومەتی لە پاراستنی ئاسایش و ئارامی ھەرێمی کوردستان و عێراق و ناوچەکە بەرز نرخاند.
سەرۆکی حکوومەت ستایشی ڕۆڵی بنیاتنەرانە و ئەرێنی نوێنەری تایبەتی سکرتێری گشتی نەتەوە یەکگرتووەکانی لە عێراق، لە ڕووی لەیەکنزیکردنەوەی لایەنە سیاسیەکانی عێراق و چەسپاندنی سەقامگیری کرد.
ئەم بابەتە 12 جار خوێندراوەتەوە
