Sûriye | Çekdarên deshilata Şamê ji pêkhateya Elewî 6 kes kuştin
PeyamaKurd – Hate ragihandin ku li gundekî herêma Banyas a Sûriyê, 6 kes ji pêkhateya Elewî di êrîşeke çekdarî de hatin kuştin.
Çavdêriya Mafên Mirovan a Sûriyê (SOHR) eşkere kir, komeke çekdar êrîşî gundê Binimre yê li gundewarê Banyasê kirin û 6 kes ji pêkhateya Elewî kuştin ku di nava wan de muxtarê gund jî hebû.
Li gorî zanyarî çavkaniyan, çekdar ji baregeha Dîsne ya leşkerî derketibûn, ku çekdarên ser bi Wezareta Berevaniyê ya rêveberiya nû ya Sûriyeyê lê dimînin.
Jêderên SOHRê diyar kirin, êrîşkaran berî ku tawana xwe pêk bînin, dirûşmên mezhebî avêtin û gefên rasterast li gundiyan xwarin, ku bû sedema derkeftina tirs û xofê di nava gund de. Hate diyarkirin ku piştî wê bûyerê pêleke koçberiyê ji wî gundî dest pê kir.
Beriya vê bûyerê jî îro Duşemê li endamekî hêzên desthilata Şamê û kurekî wî li taxa Kerem El Zeytûn a bajarê Humsê avêtibûn ser malekê û ji malbatê dayik û 3 zarokên wê û 2 mêvanên wan kuştin û herwiha bav jî birîndar kirin.
Hêjayî gotinê ye, ji destpêka îsal ve, 450 kes li parêzgehên cuda yên Sûriyeyê di encama êrîşên tolhildanê de hatine kuştin, ji wan: 438 mêr, 8 jin û 5 zarok bûn.
Ev nivîs 68 car hatiye xwendin.
