Nêçîrvan Barzanî: Divê Hikûmeta Iraqê malbatên qurbaniyên jenosîda Kurdên Feylî qerebû bike

PeyamaKurd – Serokê Herêma Kurdistanê Nêçîrvan Barzanî îro bi daxuyaniyekê li ser hesabê xwe yê Xê, 45emîn salvegera jenosîda Kurdên Feylî bi bîr anî. 

Wî diyar kir ku Kurdên Feylî di dema rêjîma berê ya Iraqê de rastî hemleyeke hovane hatine, ku tê de kuştin, girtin, koçberkirin, wendakirin û desteserkirina nasname û mal û milkên wan pêk hatiye, bi tenê ji ber ku Kurd bûn û piştgiriya şoreşa Kurdistanê dikirin.

Nêçîrvan Barzanî daxwaz ji Hikûmeta Federal a Iraqê kir ku li gorî biryara Dadgeha Bilind a Tawanan, ku ev tawan wek jenosîd nas kiriye, Kurdên Feylî qerebû bike, nasname û mal û milkên wan li wan vegerîne û pirsgirêkên wan çareser bike. 

Wî herwiha tekez kir ku Herêma Kurdistanê dê berdewam be di hewldanên xwe de ji bo bidestxistina dadweriyê û vegerandina mafên Kurdên Feylî.

Serokê Herêma Kurdistanê destnîşan kir ku jenosîda Kurdên Feylî û tawanên li dijî gelê Kurdistanê, dîrokeke reş e ku divê bibe ders ji bo avakirina pêşerojeke baştir li ser bingeha têgihiştinê û parastina mafên hemû pêkhateyên Iraqê. 

Wî bi silav û hurmet, daxuyaniya xwe ya bîranîna şehîdên Kurdên Feylî û hemû şehîdên Kurdistanê bi dawî kir.

 

Ev nivîs 49 car hatiye xwendin.