پەیامی کورد   ...   ئەنجوومەنی باڵای فەتوا بەكۆی دەنگ فەتوای دا

ئەنجوومەنی باڵای فەتوای هەرێمی كوردستان، لەبارەی مەولوودنامە و یادكردنەوەی لە دایكبوونی پێغەمبەری ئیسلام (دروودی خوای لێ بێت) ڕایدەگەێنێت، پاڵپشت بە دەقەكانی قورئان و سوننەت، مەولودنامە عورفێكی شەرعی جوانە و بەهیچ جۆرێك پێچەوانەی ڕێنماییەكانی ئایینی پیرۆزی ئیسلام نییە.

ئەمساڵ ڕۆژی لە دایكبوونی پێغەمبەری ئیسلام هاوكاتە لەگەڵ ڕۆژی پێنجشەممە 4ـی ئەیلوولی 2025، كە بەم بۆنەیەوە لە سەرجەم دام ودەزگا حكوومییەكان پشووی فەرمی ڕادەگەێندرێت و هاووڵاتیان یادی ئەو ڕۆژە بەرز و پیرۆز ڕادەگرن.

عەبدۆڵڵا شێركاوەیی، ووتەبێژی یەكیتی زانایانی ئایینی ئیسلام لە كوردستان ڕایگەیاند، ئەنجوومەنی باڵای فەتوا بەكۆی دەنگ فەتوای دا بەوەی:

یه‌كه‌م: مەولودنامە عورفێكی شەرعی جوانە و بایەخدان پێی، كارێكی باشە، بەو پێیەی یادی ژیانی پێغەمبەری ئیسلام دەكرێتەوە و بیر و باوەڕی ئایینی بەهێز دەكات.

دووەم: دەربڕینی دڵخۆشی بۆ لە دایكبوونی پێغەمبەری ئیسلام، خۆی لەخۆیدا جێبەجێكردنی فەرمانی خوایە كە هاتنی ئەو پێغەمبەرە مایەی ڕەحمەتە بۆ خەڵكی جیهان، هەر شتێكیش ڕەحمەت بێت، بە بەڵگەی قورئان باوەڕداران پابەندن كە دڵیان پێ خۆشبێت.

سێیەم: خوێندنەوەی مەولود هۆكارێكە بۆ زیاتر ئاشنابوون بە ناسینی كەسایەتی محەممەد و ژیاننامەكەی.

چوارەم: ڕۆژی لە دایكبوونی نێردراوانی خودا، گرنگترین و گەورەترین ڕووداوی ڕۆژگاری خۆیانن، یادكردنەوەی ئەو ڕۆژە پیرۆزانە بە بەڵگەی قورئان فەرزە.

لە فەرموودەی سەحیحی پێغەمبەردا هاتووە، ڕۆژی لە دایكبوونی، هەمان ڕۆژی بوونی بە پێغەمبەر و هەمان ڕۆژی ناردنی قورئانە بۆی، بۆیە بە هەموو پێوەرەكان، 12ـی ڕەبیعی یەكەمی ساڵی كۆچی، ڕۆژێكی پیرۆز و ڕێزلێگیراوە.

پێنجەم: هیچ شتێك و بابەتێكی ناشەرعی لە مەولودنامەدا ناخوێندرێتەوە، پێچەوانەی ئەوانەی كە دەڵێن بابەتی بیدعە و نادروست لەخۆدەگرێت.

شەشەم: بە درێژایی مێژووی ئیسلام چەندین سەركردە و زانای ناوداری ئایینی پیرۆزی ئیسلام، ئەو یادەیان بەرز ڕاگرتووە، خەڵكی باوەڕداری كوردستانیش لەسەر هەمان ڕێچكە و ڕێبازی پیرۆز بەردەوام دەبن.

ئەم بابەتە 15 جار خوێندراوەتەوە