پەیامی کورد    ...   ڕونکردنەوەیەک لە نووسینگەى ڕاگەیاندنى مەکتەبى سیاسی پارتى دیموکراتى کوردستان ەوە

نووسینگەى ڕاگەیاندنى مەکتەبى سیاسی پارتى دیموکراتى کوردستان، له‌ ڕوونکردنەوەیه‌ك دا له‌ بارەی بەرنامەیەکى ڕادیۆى دەنگى بزووتنەوەى گۆڕان كه‌ کەسێک بەناونیشانى بەرپرسى ئۆفیسى دەزگاى ستاندارد لە سلێمانى، بەناوى زانیارى، چەند تۆمەتێکى بەخشیوەتەوە، ڕایدەگەێنێت کە سەرلەبەرى ئەو زانیارییانە ناڕاستن و دەکەونە خانەى تۆمەت بەخشینەوەیەکى بێ بنەما.

ده‌قی ڕوونکردنەوەكه‌ی نووسینگەى ڕاگەیاندنى مەکتەبى سیاسی پارتى :

دوێنێ، ڕێکەوتى ٢٦ى ئابى ٢٠٢٥، لە بەرنامەیەکى ڕادیۆى دەنگى بزووتنەوەى گۆڕان کە لە پلاتفۆڕمەکانى سۆشیال میدیاى فەرمى کەناڵى (KNN)یش بڵاوکراوەتەوە، کەسێک بەناونیشانى بەرپرسى ئۆفیسى دەزگاى ستاندارد لە سلێمانى، بەناوى زانیارى، چەند تۆمەتێکى بەخشیوەتەوە، کە گوایە هەڤاڵ (هۆشیار زێبارى) ئەندامى دەستەى کارگێڕى مەکتەبى سیاسی پارتیمان لە کۆبوونەوەیەکدا لەگەڵ مەکتەبى سیاسی یەکیتی نیشتمانی کوردستان باسى لە  پرسى دواخستنى ڕێکەوتنى نێوان هەولێر و بەغدا کردووە سەبارەت بە دابین کردنى مووچە!

لێرەوە ڕایدەگەێنین کە سەرلەبەرى ئەو زانیاریانە ناڕاستن و دەکەونە خانەى تۆمەت بەخشینەوەیەکى بێ بنەما، بەپێچەوانەوە زێبارى و مەکتەبى سیاسى پارتیمان هەمیشە جەختیان لە پاڵپشتى حکوومەتى هەرێمى کوردستان کردۆتەوە لە چارەسەر کردنى کێشە و گرفتەکان لەگەڵ حکوومەتى فیدڕاڵى، هاوکات هانى هەردوو حکومەت دراوە بۆ گەیشتن بە رێککەوتنێکى تۆکمە بۆ دابینکردنى مووچە و شایستە داراییەکانى هەرێمى کوردستان و ڕەخساندنى کەشێکى ئارام لەپێناو ژیان و گوزەرانى مووچەخۆر و هاووڵاتیانى خۆشەویستى کوردستان.

نووسینگەى ڕاگەیاندنى مەکتەبى سیاسی پارتی دیموکراتى کوردستان. 

٢٧ى ئابى ٢٠٢٥